Aki-Matilda: Taamaatitsineq Kalaallit Nunaannuinnaq tunnganeranik takutitsivoq
Donald Trumpip Kalaallit Nunaata pisiariniarneranik kissaateqarnerata saqqummiunneqarnerata kingorna, Kalaallit Nunaata suliassaqarfini nammineq aalajangigassarigai, Siumup folketingimut ilaasortaa isumaqarpoq.
Naalakkersuisut aamma danskit naalakkersuisuisa Kalaallit Nunaat pisiarisinnaanngikkaa nalunaarutigereeraallu, Siumup folketingimut ilaasortaatitaata Aki-Matilda Høegh-Damip, pisoq Donald Trumpip Danmarkimut tikeraarnissaminik taamaatitsineranik kinguneqartoq pitsaasumik nalilerpaa.
- Tikeraarnissamik taamaatitsineq pitsaasumik takussutissaalluarpoq. Kalaallit Nunaat kisiat pissutigalugu Donald Trumpip ataatsimiikkusunnera tamatuma takutippaa, taanna Sermitsiaq.AG-mut oqarpoq.
Aki-Matilda Høegh-Damip pisup kinguneranik nunani tamalaani maluginiarneqarnera, Kalaallit Nunaannut iluaqutaalluinnartoq takusinnaavaa.
- Nunani tamalaani oqaluuserineqarnera pingaaruteqarpoq, Kalaallit Nunaata nunarsuup sinneranut ammarnissamik pisariaqartitsinera pissutigalugu.
- Aningaasaqarnikkut namminiilissagutta, nunarsuup sinneranik niueqateqarnissamik pisariaqartitsivugut, akerlianik ullumikkut suna tamarmi Danmark aqqutigalugu ingerlavoq.
Kisianni aamma nunanut allanut tunngasunut politikkimut tunngatillugu, Siumup folketingimut ilaasortaatitaa iluaqutissamik takusaqarpoq.
- Kalaallit suliassaqarfiinut tunngatillugu, Kalaallit Nunaat aalajangiisuusussaq, pisoq nunarsuup sinneranut oqariartuuteqarpoq.
- Namminiilivikkiartornermi aamma nunanut allanut tunngasunut politikkikkut sunniuteqarnerput annertusiartussaaq, Danmark aqqutigeqqaarnagu aamma Kalaallit Nunaat toqqaannartumik attaveqarfigineqarsinnaasoq maanna ersarissivoq.