Aki-Matilda: Siumut siulittaasuutitaqarnera inissaminiippoq
Qineqqusaarnerup nalaanili Socialdemokraatinik suleqateqarumanini isertuunnikuunnginnamiuk, Kalaallit Nunaat pillugu ataatsimiititaliami ukiuni marlunni siullerni siulittaasuusussanngornini inissaminiittoq, Aki-Matilda Høegh-Dam isumaqarpoq.
Sivisuumik isumaqatiginninniartoqareersorlu Socialdemokraatit Siumullu isumaqatigiipput Siumut sinnerlugu folketingimi ilaasortaq inuusuttoq, Aki-Matilda Høegh-Dam, Kalaallit Nunaat pillugu ataatsimiititaliami ukiuni marlunni siullerni siulittaasuussasoq.
Aaja Chemnitz Larsen ukiut marluk qaangiuppata siulittaasunngussaaq, tamannali naammagisimaanngilaa.
Isornartorsiuineq Aki-Matilda Høegh-Damip paasisinnaannginnerarpaa.
- Taama inissittoqarnera pillugu pakatsisoqarsimappat paasisinnaanngilara. Isumaqatiginninniarnerni siulittaasuuffik siulittaasullu tulliattut inissaq pivagut, taakkulu politikkimi sulinermi sunniuteqartitsingaatsiartussaapput, Aki-Matilda Høegh-Dam oqarpoq.
Piffissaq avinneqassaaq
Sermitsiaq.AG-mut nassuerpoq siulittaasuuffik pillugu oqaloqatigiinnerit suli qinersisoqartinnagu aallartereersimasut, qinersisoqareermalli aatsaat isumaqatiginninniarnerit aallartissimallutik.
- Qinersisoqannginnerani soorunami aamma oqaloqatigiittoqartarpoq, soorlu qinersereernerup kingorna siulittaasuuffik tigussaneringa. Taakkuli siumoortumik aalajangerneqarneq ajorput, qinersisoqareermallu aatsaat isumaqatiginninniarnerni Kalaallit Nunaat pillugu ataatsimiititaliami siulittaasuussasunga isumaqatigiissutigaarput, Aki-Matilda Høegh-Dam oqarpoq.
Piffissap siulittaasuuffigineqartussap avinneqarnera Kalaallit Nunaannut iluaqutaassasoq, kalaallillu sinnerlugit folketingimi ilaasortat suliaannut sunniuteqarluassasoq, suli taanna isumaqarpoq. Apeqqutaatinnagu kina siulliulluni siulittaasussanersoq.