Skip to main content

Aki-Matilda: Silamut tunngatillugu suliniutit assigiinngitsunik imaqartillugit eqaatsumik suliarineqassapput

Silap pissusiata allanngoriartornera unikaallatsinniarlugu suliniuteqarnermi najukkami pissutsit eqqarsaatigineqassapput, Siumut sinnerlugu folketingimi ilaasortaq taamatut isumaqarpoq

Nunani avannarlerni socialdemokraatit ministeriunerup inaani, Marienborgimi ataatsimeersuarmata silap pissusaa ulloq naallugu sammineqarpoq. Suleqatigiiffik SAMAK ataatsimiittarnermini aatsaat siullermeerluni ataasiinnarmik oqaluuserisassaqarpoq.

Aammaarluni erseqqissumik takutinneqarpoq, silamut tunngassutillit politikkikkut qanoq sammineqalertigisut - minnerunngitsumik inuusuttut silap pissusiata allanngoriartorneranut akiuniarlutik suliaqarsimanerat pissutigalugu.

Ataatsimiinnermi erseqqissumik takutinneqarpoq, socialdemokraatit silamut tunngatillugu immikkut suliniutigigaat, tamatuma atugarissaarnermut akorngusiinnginnissaa. Taamatut isumaqarneq Siumut sinnerlugu folketingimi ilaasortap Aki-Matilda Høegh-Damip isumaqatigaa.

- Nalunngilarput, aamma uagut Kalaallit Nunaanni silap pissusiata allanngoriartornera unikaallatsinniarlugu iliuuseqartariaqartugut, tamannali innuttaasunut, pingaartumillu isertitakinnerusunut kinguneqartinneqassanngilaq, taanna oqarpoq.

Aki-Matilda Høegh-Dam uku oqaloqatigiinnerannut peqataavoq Aksel V. Johannesen, Savalimmiuni Javnaðarflokkinimi pisortaq, Guðrún Ágústa Guðmundsdóttir, Islandimi sulisartut kattuffianni qullersaq, Philip Botström, Sverigemi Socialdemokratit Inuusuttaasa siulittaasuat, Astrid Hoem, Norgemi Socialdemokratit Inuusuttaanni siulittaasup tullia, Frederik Vad Nielsen, DSU Danmarkimi pisortaq.

Pingaartumik Frederik Vad Nielsenip uteqattaarlugu silamut tunngatillugu ajornartorsiutit maannakkut iliuuseqarfigineqarnissaat piumasarisaqattaarpaa, kiisalu oqaatigisarlugu politikkikut ataatsimoorluni aalajangiisoqartariaqartoq aamma ataasiakkaat iliuuseqarsinnaanermut periarfissinneqartariaqartut.

Aki-Matilda Høegh-Dam sammen med statsminister Mette Frederiksen, tidl. norsk statsminister Gro Harlem Brundtland og Sveriges statsminister Stefan Löfven
Suinni Johansen / Siumut

Aki-Matilda Høegh-Dam isumaqataavoq.

- Inuit ataqqinassusiiassanngilavut, ataasiakkaalli silamut tunngatillugu mingutsitsinnginnerusumik iliuuseqarnissaannut kajumissuseqalersissavavut.

Europami oqallittoqartarnerani inuit neqitorpallaannginerunissaat initoqaaq. Siumut sinnerlugu folktingimi ilaasortaq tamatumunnga tunngatillugu erseqqissumik oqarpoq, taamatut sunniiniarnerit sumi tamaani atorneqarsinnaanngitsut.

- Kalaallit Nunaanni naatitartorniaraangatta kilometerit tuusintilikkaat assartorneqaqqaartariaqarput. Puisimik nammineq pisaqariarluni nerineranit tamanna silamut pitsaanerusinnaanngilaq, taanna oqarpoq.

- Silamut tunngatillugu suliniutit assigiinngitsunik imaqartillugit eqaatsumik suliaqartariaqarpugut.

Kalaallit Nunaat gassinik silaannarmut aniatitsinerup unitsinneqarnissaa pillugu Parisimi isumaqatigiissummut ilaanngilaq.

- Imaanngilarli iliuuseqarnianngitsugut. Inuiannummi ikittunnguanut siaruarlutik najugaqartunut Parisimi isumaqatigiissummi piumasaqaatit malikkuminaassinnaapput aamma innuttaasut atugarissaarnissaat qulakkeeruminaassinnaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER