Aki-Matildap Pituffik pillugu isumaqatigiissuteqartoqarnera nersualaaraa
Naalakkersuisut Danmarkimilu naalakkersuisut Pituffimmi kiffartuussinissamut isumaqatigiissummi neqeroortitsinissamut piumasaqaatissanik nutaanik isumaqatigiissuteqarniarlutik suliaqarluarsimapput. Folketingi isumaqatigiissutip malinneqarnissaanut maanna nakkutiginnittariaqarpoq, taamatut isumaqarpoq Kalaallit Nunaanni folketingimi ilaasortaatitaq.
Siumut sinnerlugut Folketingimi ilaasortap Aki-Matilda Høegh-Damip, Naalakkersuisut Danmarkimi naalakkersuisunik suleqateqarlutik Pituffimmi kiffartuussinissamut USA-mik isumaqatigiissuteqarsimanerat nuannaarutigaa:
- Pingaarnerpaaq tassaavoq, kiffartuussinissamut isumaqatigissutip kalaallit/danskit suliffeqarfiutaannut utertinneqartussanngornera. Isumaqatigiissut Kalaallit Nunaanni innuttaasunut annertunerusumik iluaqusiisussanngorpoq, Aki-Matilda Høegh-Dam Sermitsiaq.AG-mut oqarpoq.
Isumaqatigiissummili suna pitsaanerusinnaanerugaluartoq aamma oqaatigaa.
Kalaallinit tamakkiisumik ingerlanneqartuuguni pitsaanerussangaluartoq
- Soorunami kalaallit ingerlatseqatigiiffiutaannit tamakkiisumik ingerlanneqarnissaa kissaatiginaraluarpoq, isumaqatigiissutilli aaqqissuunneqarsimanerat malillugu kalaallinit immaqa ingerlanneqarsinnaalissaaq, Aki-Matilda Høegh-Dam oqarpoq.
Politikkerip nunanut allanut ministeri Jeppe Kofod (Soc), Danmarkimi naalakkersuisut isumaqatiginninniarnermi Kalaallit Nunaannik peqataatitsisimanerat pillugu nersualaarpaa.
- Minnerpaamik peqataatititsineruvoq, aamma taamaattuaannartussaavoq, taanna oqarpoq.
Malinnaaniartoq
Ukiuni aggersuni Pituffimmi isumaqatigiissut neqeroorutigineqaqqilerpat, isumaqatigiissut naammassineqassanersoq Aki-Mathilda Høegh-Damip malinnaaffiginiarpaa:
- Folketingimi Kalaallit Nunaannit qinikkat tamarmik Pituffik pillugu pingaarutilinnik apeqquteqartarsimapput ataatsimiinnerpassuarnilu peqataasarsimallutik, maannalu isumaqatigiissuteqartoqarnerani – Naalakkersuisunut Danmarkimilu naalakkersuisunut ataqqinaataasumik – pingaaruteqarpoq Folketingip suliarisimasaanik ingerlatitseqqiinissaq. Tassalu Pituffimmi susoqarneranik malinnaajuarnissaq.
- Soorunami susoqarneranut malinnaassaagut, Aki-Matilda Høegh Dam oqarpoq.