Skip to main content

Aki-Matildap Aaja isornartorsiorpaa: Meeqqanik atornerluineq kulturerinngilarput

Aki-Matilda Høegh-Damip taamaakkaluartoq kinguaassiutitigut atornerluisarnernut akiuinermi qanimut suleqatiginnikkumanini oqaatigaa.

Meeqqat atornerlunneqartarneri pillugit Aaja Chemnitz Larsenip (IA) oqaatigisaa Aki-Matilda Høegh-Damip (S) eqqarsarnartoqarsipaa.

Oqaaseqarneq TV2-mit apersorneqarnerani pivoq.

- Ajoraluartumik kulturimut ilaaginnarsoraara. Taamaattumillu sakkortuumik iliuuseqarfigineqarnissaa pingaarutilerujussuusoq isumaqarpunga, Aaja Chemnitz Larsen (IA) TV2-mut ilaatigut taama oqarpoq.

Kisianni Aki-Matilda Høegh-Damip (S) tamanna isumaqatiginngilluinnarpaa.

- Naak Kalaallit pillugit isumaqatigiissutigisinnaasagut arlaqaraluaqisut una pillugu toqqaannartumik isumaqatiginngilara. Qanormi aamma atornerluineq tamanut atortutut imaluunniit inooriaasertut kulturitut oqaatigineqassava, taanna tusagassiuutinut nalunaarummi allappoq.

- Ilisimatusarninni aamma ilinniarsimasama ilaat tassaapput qanoq nunasiaataasimasut ineriartortarnersut qanorlu nukittorsaqqinneqassanersut. Nalunngilara uagut Kalaallit kinaassuserput piorsarsimassuserput, tassa kulturerput najoqqutaralugu ajornartorsiutigut aaqqittussaagigut. Naleqassuserput nukittorsartussaavarput immitsinnut nakkarsarnata. Taamaammat meeqqanik atornerluineq kulturitut taakkartornera akuerisinnaanngilara.

Innuttaasut peqataatinneqassapput

Kisianni Aki-Matilda Høegh-Dam (S) kulturimut tunngatillugu oqariartuuteqarnermut isumaqataanngilluinnaraluarluni, ajornartorsiutip akiornissaanut qanimut suleqatigiinnissamut piareersimavoq. Tassanilu innuttaasut qitiutinneqarnissaat pingaaruteqarnerarpaa.

- Nukittorsaasa nakkarsaanata, imaanngitsoq eqeersaasoqassanngitsoq, taamaattorli nukersoreertut allannguiniarlutik nakkarsassanngilagut. Akisussaaffik uagut kalaaliusugut tamatta pigaarput inerisassavarpullu. Politikkeritut akisussaaffipput tassaavoq inuiaqatigiit aqqutissiuullugit, akisussaaffimmik tunineqarnissaminnut periarfissinneqarnissaat. Inuiaqativut nukittorsanngikkutsigit peqataatinngikkutigit ajornartorsiut aaqqinnavianngilarput.

INUA maligassiuisuuvoq

Suliniutit soorlu INUA/Røde Korsip nunatsinni aallartissimasaa, najukkami aaqqiissuteqartoqarsinnaaneranut assersuutitut oqaatigai.

- Tarnikkut ikiueqqaarnermut ilinniartitsineq, arfineq marlunnik periusilimmik eqeersaaneq, toqqaannaq inuiaqatigiinnik akisussaaffimmik tunisillutilllu periarfissiisut, illoqarfiat najoqqutaralugu nukittorsaasut. Taamaattorli ataavartumilli aningaasannassinaasanngitsut. Tamanna aaqqittariaqarpoq.

Aki-Matilda Høegh-Damip (S) Naalakkersuisut, Inatsisartut, Aaja Chemnitz Larsen (IA), kommunit, kajumissutsimik suliaqartut, psykologit aamma kattuffiit ataatsimut aaqqiissuteqarnissamut suleqatiginissaannut piareersimavoq.

- Immikkut siunnersuuteqaannarsinnaanngilagut, inuiaqatigiinnillu nakkarsaaginnarsinnaanngilagut. Qularinngilara ataatsimoorfeqarsinnaasugut, ilumut suleqatigiikkutta immitsinnut avaqqunnata.  Nukissaqarluarlunga ilaserinnippunga. Aatsaammi taamannak qulakkiissavarput ataavartumik suliagut malunniuteqassasut imaanngitsoq ukiut 10 qaangiuppata puigorneqassasoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER