Folketingimi ilaasortaq Aki-Matilda Høegh-Dam USA-mi Repræsentanternes Hus-imi kongressimi ilaasortanngorlaamik, Mary Peltola, yupiusumik ataatsimeeqateqaqqammerpoq.

Qinigaaqqammertoq demokratiuvoq, nunallu inoqqaavinik kingoqqisunit kongressimi ilaasortanngortuni siullersaalluni.

- Mary Peltolap suleqatiginissaa attaveqarfigilluarnissaalu pingaaruteqartutut isigaara. Nunarput Alaskalu assigiissuteqangaatsiarpugut, soorlu pinngortitarput, kulturerput nunarsuarmilu inissisimanerput. Taamaasilluta aamma suliani immitsinnut isumassarsiorfigisinnaavugut, Aki-Matilda Høegh-Dam oqarpoq.

Nunat arlalinnik assigiissuteqartut isumassarsiorfigisinnaaneri, suliniutillu nunap aappaani iluatsissimasut atorniarneqarsinnaaneri taassuma maluginiarpaa, pigaartumik assigiimmik kultureqartoqartillugu.

- Nunat allat nalinginnaasumik isumassarsiorfigisartakkagut qimaaminerullugit, assersuunnerusinnaaffigisagut isumassarsiorfiginerusinnaagunarpagut, oqarpoq.

Aalisarneq sulilersitsinerlu

Aki-Matilda Høegh-Dam (S) Mary Peltolalu sisamanngornermi 15. september ataatsimeeqatigiipput. Isumasioqatigiinnermi ilaatigut aalisarneq sulilersitsiniaanerlu eqqartorneqarput.

- Alaskami arlalinnik aalisariaaseqartarput. Inuusuttut aalisarnerup tungaatigut aalajangiisinnaanerutinneqaraangata peqataatinneruneqaraangatalu, aamma inunnik isumaginninnerup iluani ajornartorsiutit annikinnerusartut maluginiarneqarsimavoq. Tamanna nunatsinni atorsinnaasutut aamma isumassarsiorfiusinnaavoq, Aki-Matilda oqarpoq.

Folketingimi ilaasortat sammisat taakku nunatsinni aalajangeeqataaffiginissaanut toqqaannartumik periarfissaqanngikkaluartut, Aki-Matilda Høgh-Dam isumaqarpoq nunap inoqqaavi politikkimik suliaqartut nunat killeqarfii akimorlugit attaveqatigiinnerunissaat pisariaqarluinnartoq.

Folketingimi ilaasortaq aamma kongressimi ilaasortaq nunartik sinnerlugu nunami allami, allatut kultureqartumi tamarmik politikkimik suliaqarput.

- Politikkimik sumiluunniit suliaqaraluaraanni, inatsisartunik suleqateqarnermi attaveqaatit annertusarnissaat pisariaqartuaannarpoq. Suleqatigiinneq attaveqatigiinnerlu pitsaasoq, pingaartumik naggueqatitsinnut, pingaaruteqarpoq, Aki-Matilda Høegh-Dam oqarpoq.

Aki-Matilda Høegh-Dam folketingimi ilaasortat allat peqatigalugit Washingtonimi New Yorkimilu paasisassarsiorluni ulluni makkunani angalavoq.