Aki-Matilda: Kalaallit Nunaat pillugu ataatsimiititaliami siulittaasunngussaanga
Siumut sinnerlugu folketingimi ilaasortaq Aki-Matilda Høegh-Dam ilisimatitsivoq Folketingimi Kalaallit Nunaat pillugu ataatsimiititaliami siulittaasunngussalluni.
- Folketingimi Kalaallit Nunaat pillugu ataatsimiititaliami uanga, Aki-Matilda Høegh-Dam, siulittaasunngorpunga. Ukiut siulliit marluk siulittaasooreeruma siulittaasuuffik aallartitaqatinnut ukiut marluk kingulliit tunniunneqassaaq, Siumut sinnerlugu folketingimi ilaasortaq danskit nalunaaqutaat malillugu ataasinngornermi unnukkut tusagassiutinut nalunaaruteqarluni ilisimatitsivoq.
Ukiut marluk qaangiuppat Aaja Chemnitz Larsen siulittaasutut issiasussanngorpoq.
Naligiittut suleqatigiinneq
- Suleqatigiilluarnissaq angorusullugu Kalaallit Nunaat pillugu ataatsimiititaliami siulittaasuuffik kisermaanniarnagu qangatuulli ukiut marlukkaarlugit naligiimmik avinneqartarnissaa isumaqatigiinniarnermi ataasiaannarnanga piumasarisimavara, Folketingimi ilaasortaq inuusuttoq Siumumeersoq allappoq.
Itisiliivoq:
- Ukiut sisamat tamakkerusussimanngilara, nunarpulli sinnerlugu aallartitaqatiga qinigaaffimmi uani anngussaqarluarnissaanik aamma periarfissikkusuppara, taamani Siumup IA-llu suleqatigiilluarsimanerat atuutsileqqikkusullugu.
Aki-Matilda Høegh-Damip naggasiutigalugu allappaa siulittaasuuffiup piffissarititaanik avitsineq Kalaallit Nunaannut pitsaanerpaamik angusaqarnissamik qulakkeerisuusoq.