Aki-Matilda: Folketingi Uummannap eqqaani kalerrisaarummik pilersitsissaaq
Danmarkimi aningaasanut inatsisissaq isumaqatiginninniutigineqaleruttorpoq, kissaatigineqartullu ilagaat Avannaani qaqqap innaata sisoorneranik kalerriisinnaasumik kalerrisaaruteqartoqarnissaa.
Uummannami nunaqarfiinilu innuttaasut toqqissisimanerutinneqassapput, taamaammat qaqqap innaata sisoorneranik kalerriisinnaasumik kalerrisaarummik atuutsitsilernissamut Folketingi ikiuuttariaqarpoq.
Taamatut isumaqarpoq Siumut sinnerlugu folketingimi ilaasortaq Aki-Mathilda Høegh-Dam, Danmarkimi aappaagumut aningaasanut inatsisissaq pillugu isumaqatiginninniarnermi tamatumannga qaqitsisimasoq.
- Inuit toqqissisimanngillat qaqqallu innaata sisoorsinnaanera, siusinnerusukkut inuit inuunerannik naleqarsimasutut tassaarsuaqarsinnaanera pillugu akissutissanik amigaateqarlutillu erseqqissumik paasissutissinneqarsimanngitsut.
- Folketingimi kalerrisaarutit eqqortut atorneqarnissaat qulakkiissavarput, sumiiffinni innuttaasut toqqissisimanerulerniassammata. Norgemi Schweitzimilu qaqqat innaasa sisoornerannik aputillu sisoorneranik kalerrisaarisartunik ukiorpassuarni atuisoqarsimavoq. Taakkunannga ilisimasanik pissarsisoqarsinnaavoq, Aki-Mathilda Høegh-Dam Danmarkimi aningaasanut inatsisissaq sisamanngormat siullermeersumik Folketingimi oqaluuserineqarmat oqarpoq.
Karrat Kangerluanni qaqqap sisooqqissinnaanera pillugu nalunaarusiaq nutaaq upernaaq saqqummiunneqarpoq. Nalunaarusiami inerniliunneqarsimavoq, Karrat Kangerluanni qaqqap innaa sisooriaannaasoq ataatsikkut sisooraluarpat, tassaarsuaq kingullermit tassaarsuaqarmat marloriaammik angitigisoq nunaqarfinnik arlalinnik Uummannallu umiarsualiavianik eqquisussaasoq.
Eqqartuussiveqarneq amerlanerusunik aningaasaliiffigineqassasoq
Tamatuma kingornatigut oqartussanit inuit tassaarsuaqarneranit ulorianartorsiortussat allamut nuunnissaannik neqerooruteqarnissaq sulissutigineqarpoq.
Siumut sinnerlugu politikkerit kalerrisaaruteqarnissap saniatigut kissaatigaa, Kalaallit Nunaanni eqqartuussiveqarnerup ingerlanneqarneranut Folketingi amerlanerusunik aningaasaliissuteqassasoq. Suliassaq Danmarkimi naalagaaffimmik oqartussaaffigineqarmat.
- Kalaallit Nunaannut Ataatsimiititaliap tikeraarnerani takuarput, eqqartuussiviit elektroniskiusumik toqqorsiveqanngitsulluunniit. Tamatuma saniatigu sullissinermi piffissaq sivisoorujussuaq atorneqartarpoq, pineqatissiissut malillugu inissiisarfimmut inissinneqartussat utaqqisorpassuupput, pineqaatissinneqarsimasunut inissiisarfinni inissat sulisussallu amigaatigineqarput, tarnikkut katsorsarneqarnissamut naammattumik neqerooruteqarsinnaanngillat, aqutsisullu aperigaanni akissutigisartagaat ataasinnaavoq: Aningaasassaqartinneqanngilaq, Aki-Matilda Høegh-Dam oqarpoq.