Aki-Matilda: Akunnerit 13-it sinnerlugit oqallinnermi Kalaallit Nunaat amigaataavoq

Aki-Matilda Høegh-Dam Siumumeersoq kalaallisut oqalugiarnermini oqallitsitsivoq. Pingasunngornermi Folketingimi naggataarutaasumik oqallittoqarnerani Kalaallit Nunaat sammineqanngippallaarpoq, politikeri isumaqarpoq.

Folketingimut ilaasortaq Aki-Matilda Høegh-Dam (S) maajip aallartinnerani Folketingip oqaluttarfiani kalaallisut oqalugiarniarluni aalajangermat annertuumik oqallisaavoq.

Naggataarutaasumilli oqallinnermi akunnernik 13-inik sivisussuseqartumi, pingasunngornermi Folketingimi pisumi, Kalaallit Nunaat pillugu siunnersuuteqartoqanngingajallunilu oqalugiartoqanngingajappoq.

Aki-Matilda Høegh-Damip Siumumeersup pingasunngornermi unnukkut oqalugiarnermini tamanna oqaatigaa.

- Kalaallit Nunaat pillugu ataatsimiititaliami ammasumik tusarniaatitsisoqartaraluartoq, kiisalu annerusunik oqallittoqartaraluartoq, tamanna pillugu ullumikkut Folketingimi oqallittoqarnerani suli tusagaqanngilagut.

- Kisianni oqaluttarfimmit qallunaat oqaasiinit allaanerusunik oqalukkama kakkaak mamiatsattoqarmat.

- Nipaalluinnartoq

Oqallittoqarnerani nunap iluani imeq, anorisaatit aamma qarasaasiatigut pilersitamik silassorissutsimut tunngasut – allarpassuillu oqaluuserineqartut, Aki-Matilda Høegh-Damip oqaatigaa.

Taamaattoqarneranilu ”Kalaallit Nunaat pillugu sammisanut tunngatillugu aarlerinartumik nipaarluusoqarpoq”.

- Ministeriunermit (Mette Frederiksen (S), aaqq.) oqaaseqaatit, parteeqataata imaluunniit apeqqut ataaseq marlulluunniit saniatigut Kalaallit Nunaat, kalaallit inuiaat imaluunniit Danmarkip Kalaallit Nunaanni oqartussaaffii pillugit oqaaseqartoqanngingajappoq.

- Kalaallit Nunaanni eqqartuussiviit qanoq pitsanngoriartinneqarsinnaanerannut apeqquteqartoqanngilaq, Aki-Matilda Høegh-Dam assersuusiorluni oqarpoq. Folketingilu aamma FN-ip nalunaaruteqartartuata ukiup aallartinnerani isornartorsiuineranut qisuariaateqarsinnaagaluartoq oqaatigaa, tassani FN-ip nalunaaruteqartartuata Danmarkip kalaallinut ammip qalipaataa tunngavigalugu immikkoortitsisarneranik isornartorsiuivoq.

Arlalinnit nersualaarneqartoq

Maajip qiteqqunnerani naalagaaffeqatigiinneq pillugu oqallittoqarnerani Aki-Matilda Høegh-Dam kalaallisut oqalugiarniarluni aalajangerpoq.

Tamatumalu kingorna folketingimut ilaasortat allat apeqquteqaraangata kalaallisut akisarpai, tamannalu tupaallaatigineqarpoq.

Ilaatigut SF-meersoq Karsten Hønge, ”kalaallit tusagassiorfiini atorneqarnissaa piinnarlugu pisumut tassunga isiginnaartuuniarani” oqarpoq.

Pingasunngornermi naggataarutaasumik oqallittoqarnerani Aki-Matilda Høegh-Damip oqalugiarnermigut Kalaallit Nunaannut ukkatarinninnerulersitsiniarnera folketingimut ilaasortanit arlalinnit nersualaarneqarpoq.

Jarlov: Nalunaarutigisimappagu ileqqorissaarnerusimassagaluarpoq

Aki-Matilda Høegh-Damip folketingimut ilaasortat qisuariarnerannut isornartorsiuinerani, illuanik Rasmus Jarlov (K) ”naqqiuteqarusuppoq”.

- Nalunaarutigineqarsimagaluarpat ileqqorissaarnerusimassagaluarpoq, taamaalilluta tamatuma peqatigisaanik malinnaasinnaassagaluarpugut, taanna oqarpoq.

Nunatsinni Folketingimut ilaasortaq Aaja Chemnitz Inuit Ataqatigiinneersup Kalaallit Nunaata Danmarkillu akornanni attaveqatigiinneq pingasunngornermi oqaaseqarfigaa.

Ukiumi kingullermi Danarmkip Kalaallit Nunaatalu akornanni attaveqatigiinneq ajornakusoorsimasoq oqaatigaa, ”ajortuliallu saqqummerartut”, meeqqat misileraataasimasut pillugit aamma spiralilersuisoqarsimaneranik suliat pineqarlutik.

Tamatuma peqatigisaanik naalagaaffeqatigiit Issittumi aallartitaannik Kalaallit Nunaat apereqqaarnagu toqqaasoqarneranik Aaja Chemnitzip naammaginninnginnini uteqqippaa.

Aallartitap kalaaliunissaanik taanna kissaateqarpoq.

Powered by Labrador CMS