Aki-Matilda: Aajap tunuliaqutini eqqaamasariaqarpai
Siumut folketingimut ilaasortaatitaa Aki-Matilda Høegh-Dam Kalaallit Nunaanni ataatsimiititaliami maanna siulittaasuusimalersoq suleqatiminut ataatsimiititaliami siulittaasunngortumut siunnersuuteqarpoq. Siulittaasuusimasup ukiut marluk ingerlanerini angusani naammagisimaarpai.
Kalaallit Nunaat pillugu ataatsimiititaliami siulittaasuusimasup suleqatiminut siulittaasunngortussamut Aaja Chemnitz Larsenimut IA-meersumut siunnersuuteqarpoq.
2019-imi qinersinerup kingorna politikeri inuusuttoq ingerlaannaq ulappuserpoq, Kalaallit Nunaallu pillugu ataatsimiititaliami siulittaasunngorluni. Aki-Matilda Høegh-Damip maannamut siulittaasutut naammassisimasani tanngassimaarutigalugit oqaatigaa.
- Tanngassimaarutigaara statsministerimiit meeqqanut misileraataasimanut 22-inut utoqqatsertoqarmat, isertitsivinni nakkutilliisut politiillu Nunatsinni akissarsiai qaffanneqarput, meeqqanullu immikkut pisariaqartitsisunut 80 millionit koruunit Kalaallit Nunaannut immikkoortinneqarput. Kalaallit Nunaat aamma nunanut allanut tunngatillugu oqartussaaqqataanerulerpoq, Aki-Matilda Høegh-Dam Sermitsiaq.AG-imut oqarpoq.
Aajap tunuliaquttani eqqaamasariaqarpai
Issittumi pissaanilissuartut Danmark imminut taaguleraangami Aki-Matilda Høegh-Dam qununani folketingemi sassartarnini tusaamasaassutigaa. Folketingilu 2019-imi ammarneqarnerani oqalugiaamini utoqqatsertoqarnissaanut piumasaqarami statsministeri Mette Frederiksen killitsillugu attortisimaartinnikuuaa.
Siulittaasumik paarlaanneq juulip tallimaanni pisortatigoortumik naammassineqassaaq. Ullorlu nallerneqannginnerani maannamut suliarineqarsimasut IA-p politikerianut ingerlateqqinneqassallutik. Ingerlatitseqqiinerlu ikinngutinnersumik kaammatuutimik ilaqarpoq.
- Marluulluta Kalaallit Nunaanni innuttaasut sullippagut. Tamanna eqqaamassavarput. Ulapaarfiusorujussuarmimi ilaanni tunuliaqutit puigoqqajaannarsinnaasarput. Aaja Chemnitz Larsenip tunuliaqutini eqqaamasariaqarpai kikkullu sinnerlugit aallartitaanerluta eqqaamassavaa. Amerlasuutigummi danskit ileqqui iliuuserisartagaallu ilaartariaqartarsimavakka angorusutat anguniarlugit, Aki-Matilda Høegh-Dam oqarpoq.
Aki-Matilda Høegh-Dam 3.450-iniit amerlanerusunik taaguuneqarluni folketing-mi 2019-imi ilaasortanngorpoq. Aaja Chemnitz Larsenilu 5.600-iniit amerlanerusunik taaguuneqarluni folketing-mi ilaasortanngorpoq.