Aki-Matilda partiit ataatsimiinnerat pillugu: - Wow

Siumumit qinigaarlaamut inuusuttumut, Aki-Matilda Høegh-Damimut, sapaatip-akunneri ulapaarfiusimapput.

Inissitassat assigiinngitsut, tamatuma saniatigut Christiansborgimi suli allaffittaarnikuunani. Allattoqarfimminut sulisunik aatsaat atorfinitsitsinialeruttorpoq. Naalakkersuisoqatigiiliorniarluni isumaqatiginninniarnerit kisiinnangajammi suliaqarfigisimavai.

Taamaakkaluartoq socialdemokraatit gruppianni, ataatsimiinnerannut aalajangersimasumik peqataaffigisartakkaminut tigulluarneqartutut misigisimavoq.

- Gruppip ataatsimiinneranut siullermut iserama, Mette Frederiksen oqarpoq: ’Aana Aki-Matilda Høegh-Dam Kalaallit Nunaanneersoq. Tikilluaqquniartigu. Neriuppunga tigulluassagissi.’

- Taamatut tikilluaqquneqarneq isumalluarnarpoq, Aki-Matilda Høegh-Dam (S) taama oqarpoq.

Isumaqatigiissut naammagisimaartorujussuugaa

Socialdemokraatit Radikale Venstrenut, SF-imut aamma Enhedslistenimut politikkikkut isumaqatigiissusiaani Kalaallit Nunaani titarnerni ikitsunnguani taaneqarpoq.

- Pitsaasuusoq isumaqarpunga. Isumaqatigiissut tamarmi oqaatsinik nalinginnaasorujussuarnik imaqarpoq, taamaammat Kalaallit Nunaat pillugu immikkoortoq nalinginnaasorujussuunera tupigusuutiginngilara.

- Allaqqasoq naammagisimaartorujussuuara.

Socialdemokraatit isumaqatiginninniarfigineranni, Kalaallit Nunaat aamma Naalagaaffeqatigiinneq pillugit immikkoortuni marlunni Aki-Matilda Høegh-Dam qanoq allaqqasoqarnissaanik aperineqarpoq.

- Naligiinneq kiisalu danskit suliassaqarfiisa ineriartortinneqarnerat pillugu allaqqasoqarnissaat pingaaruteqartoq oqaatigaara. Taakku tamarmik allaqqapput, tamannalu nuannaarutigaara.

Pitsaasumik ilimasunneq

Qallunaat kalaallillu politiivisa akissarsiaasa assigiinnissaat taassuma qineqqusaarnermi ilungersuussaasa ilagaat.

- Neriorsuuteqareerpallaarnianngilanga, kisianni Socialdemokraatit ataatsimeeqatiginerinit siullernit pitsaasumik ilimasuuteqarpunga.

- Oqaloqatigiinnermik pitsaasumik ilumoorsaartumillu aallartippugut, neriulluarnartoq isumaqarpunga.

- Mette Frederiksenip pitsaasumik naalakkersuisoqatigiinni siuttuujumaartoq qularutiginngilara, Kalaallit Nunaatalu soqutigisaanik aamma suliarinnissasoq, taanna oqarpoq.

- Mettep Kalaallit Nunaat paasisinnaavaa

Aki-Matilda Høegh-Damip Mette Frederiksenip immikkut ittumik toqqissimaffiginninnera ministeriuninngortoq ilisimareerneranik pissuteqarpoq. Tassami Siumup aamma Socialdemokraatit akornanni suleqatigiinnissamik isumaqatigiissut 2016-imi suliarineqarmat Aki-Matilda Høegh-Dam ilaavoq.

Tassanilu ilinniakkaminni ataatsimut oqaaseqarnerminnik paasinnippoq. Aki-Matilda Høegh-Dam naalagaaffiit pissusiinik nunasiaateqarsimanermik aamma naalagaaffinnik ineriartortitsinermik sammisaqarluni ilinniarsimavoq. Mette Frederiksen Afrika pillugu ilinniagaqarpoq.

- Taamaammat ingerlaannaq oqaloqatigiilluarsinnaalersimavugut paaseqatigiillutalu. Mettep (Frederiksen, aaqq.) Kalaallit Nunaata inissisimanera paasilluartorujussuuaa.

- Qineqqusaarnerup ingerlanerani ministeriuninngornissaata taperserneranik oqarama, Socialdemokraatit Siumumik suleqateqarneranik kisimi tunngaveqanngilaq. Mette Frederiksenip ministeriunerunera Kalaallit Nunaannut pitsaanerpaasoq nammineq isumaqarpunga.

Ersaattaannerujussuaq

Oqaloqatigiinnerput sioqqutilaarlugu Aki-Matilda Høegh-Damip nammineq isummaminik naalakkersuisut Kalaallit Nunaannut pitsaanerpaasut nuannannerannut peqataavoq. Mette Frederiksenip partiit tapertaasut pingasut marlunngornermi unnukkut isumaqatigiissuteqarfigineqarnerisa kingorna folketingimi gruppi siullermeerluni ataatsimeeqatigaa.

- Nuannertupilussuuvoq. Tupinnaannarpoq.

- Manna ullumikkut kiattorujussuuvoq, taqqamanilu gruppip ataatsimiiffiani suli kianneroqaaq, taamaammat tamarmik kiagupput. Tamatuma saniatigut tamarmik imminnut pilluaqqullutik ’iluatsipparput’ oqaatigeqattaarpaat.

- Mette Frederiksen inimut isermat, isersimasut 60-t missaanniittut nipituumik ersaattaapput, iikkat aalangajappulluunniit.

- Soorunami siullermik Siumuuvunga, kisianni aamma socialdemokraatiuvunga, taamaammat annertoqaaq.