Aki-Matilda ministeriunermiittoq: Siammasissumik naalakkersuisoqarnissaq ammaffigineqarpoq

Siumup folketingimut qinigaateqqitaata Aki-Matilda Høegh-Damip, naalakkersuisunngortitsinissaq pillugu Mette Frederiksenip siullermeerluni ataatsimeeqatiginerata kingorna avammut nalunaarutissaqarpallaanngilaq. Illuatungeriit akimorlugit siammasissumik naalakkersuisoqalernissaali itigartitsissutiginngilaa.

Ministeriunerugallartoq Mette Frederiksen partiit tamarluinnaasa Nunat Avannarlernit ilaasortat ilanngullugit isumaqatiginninniarnernut tallimanngornermi qaaqquai.

Isumaqatigiinniarnerit ministeriunerup najugaqarfiani Marienborgimi ingerlanneqarput, folketingimullu qinigaaqqammersoq Aki-Matilda Høegh-Dam (S) tallimanngornermi ullaakkut Mette Frederiksenimut politikikkut kissaatini piumasaqaatinilu oqaluttuariniarlugit isersimavoq.

- Matoqqasumik isumaqatiginninniarnerit pillugit aalajangersimasunik oqaaseqarsinnaanngilanga. Kisianni soorunami qineqqusaarnermi oqaatigisavut tamaasa qaqippakka, Aki-Matilda Høegh-Dam, Sermitsiaq.AG-mut oqarpoq.

Taassuma ilaatigut suliassaqarfiit Danmarkimit akisussaaffigineqartut nutarterneqarnissaat, taamaalillutillu ullutsinnut naleqquttunngortinneqarnissaat kissaatigaa.

Danmarkip Kalaallit Nunaatalu akornanni oqaluttuarisaanermi pisut qulaajarneqarnerisa aallartinneqarnissaat kiisalu kalaallinut Danmarkimiittunut pissutsit.

Partiit talerperliit ammaffigigai

Naalakkersuisunik pilersitsinissamulli Siumut kissaatai qanoq innersut ersarinngillat.

- Oqarsinnaavugut ammasorujussuulluta. Naalakkersuisuni kiap issianera uagutsinnut apeqqutaanerpaanngilaq, kalaallit politikkiata ilaanissaa pingaarneruvoq.

Siumut saamerliit naalakkersuisuunissaannut imaluunniit siammasinnerusumik naalakkersuisoqarnissamut, Aki-Matilda Høegh-Damip piumasaqaatimi isumaqatigiinniarnerni akueritinnissaannut aalajangiisuuneranut tunngassuteqannginnerarpaa.

- Kalaallit Nunaat imminermini isumaqatigiinniarnerni tunngavissaaoq oqaatigineqarsinnaavoq. Naalakkersuisuni nutaani kinaluunniit peqataagaluarpat, nunatsinnit politikkimik ingerlatsisussaavugut.

- Siornatigut partiit talerperliit aamma suleqatigisareerpavut, siammasissumillu naalakkersuisoqarnissaa itigartitsissutiginngilarput.

Moderaternemit attaveqartoqanngitsoq

Moderaternemi siulittaasoq Lars Løkke isumaqatiginninniarnerit pillugit qinersinerup unnuaani Aaja Chemnitzimut (IA) sms-ernerata assinganik, talerperliit naalakkersuisuunissaannut tapersersuisinnaanersoq tusarniaalluni attaveqarsimannginnerarpaa.

Siumup kikkut suleqatiginissaannut soorunami killeqartoq, Aki-Matilda Høegh-Dam isumaqarpoq.

- Aalajangersimasunik tikkuartuinianngilanga, kisianni piffissami kingullermi partiit Kalaallit Nunaannik oqaluuserinninnerminni sakkortusaartut mianersorfigineruagut.

Mette Frederiksenip tulliani iliuuseqarnissaa Siumup folketingimut ilaasortaatitaata maanna utaqqimaarpaa.

- Aggersarneqaqqinnissarput naatsorsuutigaarput, qanorlu ineriartortoqarumaarnersoq takussavarput.

Powered by Labrador CMS