Aki-Matilda inissiisarfiit nutarterneqarnissaannik piumasaqartoq
Folketingimi ilaasortap kissaatigaa, Danmarkimi naalakkersuisut inissiisarfiit nutarterneqartariaqartut iliuuseqarfigissagaat, aamma Naalakkersuisut Kalaallit Nunaannut tunngasutigut nunanut allanut poltikkimik namminneerlutik ingerlatsinissaat akuersaassagaat.
Kalaallit Nunaanni pinerluuteqarsimasunut inissiisarfiit arlallit ima ajortigipput inuit pisinnaatitaaffiinut uniuuttutut taaneqarsinnaangajallutik. Aki-Matilda Høegh-Damip sisamanngormat Folketingimi ammaanersiornermi oqalugiarami erseqqissaataasa tamanna ilagaat:
- Kalaallit Nunaanni pinerluuteqarsimasunut inissiisarfiit Danmarkip naalagaaffiata akisussaaffigisai aserfallalluinnarput, barakkillu ilaat piaarnerpaamik nutarterneqartariaqarlutik.
- Inuit pisinnaatitaaffii unioqqutittarlugit taamatut ajortigisut avatangiiseralugit katsorsaaniarneq nalinginnaasumillu inooqqilersinniarlugit suliniuteqarniarneq ajornarpoq. Piaarnerpaamik nutarterisoqarnissaa pisariaqarpoq, folketingimi ilaasortaq oqarpoq.
Ilinniartitsineq kalaallisut ingerlanneqartassasoq
Aki-Matilda Høgh-Damip aamma oqaatigaa, pingaaruteqartoq Kalaallit Nunaanni Pinerluuteqarsimasunut Isumaginnittoqarfiup nunami pinerluuteqarsimasunut inissiisarfinni sulisinnaazunik annaasaqannginnissaa, tassa sulisinnaasut danskisut pikkorippallaannginnerat pissutigalugu:
- Attanneqarsinnaasutut aaqqiissutissatuaavoq, pinerluuteqarsimasunut inissiisarfimmi nakkutilliisartussatut ilinniartitsinerup kalaallisut ingerlanneqartarnissaanik peqatigiilluta qulakkeerinninnissarput, Aki-Matilda Høegh-Dam siunnersuuteqarpoq.
Folketingimi ilaasortap aamma periarfissaq atorlugu oqaatigaa, Kalaallit Nunaat nunanut allanut tunngasutigut politikkimik nammineerluni ingerlatsisinnaasariaqartoq.
Nunanut allanut tunngasutigut isumannaallisaanermullu politikki Danmarkimi naalakkersuisunit suli akisussaaffigineqarpoq:
Danmarki alaatsinaattuusariaqartoq
- Takorluulaariarsiuk ilissi danskit qanoq misigisimassanerlusi, Kalaallit Nunaanni politikkerimit nuimasumit akuerineqaqqaarasi politikkereqatissinnik Norgemeersumik politikki pillugu oqaloqateqarsinnaanngikkussi, EU, Tyskland imaluunniit Kalaallit Nunaat akuersiteqqaarnagit nunanut allanut tunngasutigut politikkikkut isumaqatiginninniarsinnaanngikkussi, Aki-Matilda Høegh-Dam oqaluttarfimmit oqarpoq.
Kalaallit Nuaannut tunngasutigut nunanut allanut politikkimik ingerlatsineq Naalakkersuisunit tamakkiisumik ingerlanneqartariaqartoq erseqqissaatigaa:
- Nunat tamalaat oqallittarfii Danmarkip Kalaallit Nunaat tunngavigalugu ilaasortaaffii Kalaallit Nunaanni isumagineqartariaqarput, Danmarkip naalagaaffia siunnersortitut alaatsinaattutullu issiaqataasarluni. Tamanna piaarnerpaamik pisariaqarpoq, Aki-Matilda Høegh-Dam oqarpoq.