Aki-Matilda Høegh-Dam: Kalaallisut oqalussinnaasariaqarpugut
Siumut sinnerlugu folketingimi ilaasortaq, Aki-Matilda Høegh-Dam oqaaseqarnini kalaallisut saqqummiuppaa, takutinniarlugu misigitinniarlugulu isummani naapertorlugu naalagaaffeqatigiinneq piunngitsoq. Taamak iliornera maanna folketingip siulittaasoqarfiani oqaluuserineqartussanngorpoq.
Folketingimi ilaasortap Aki-Matilda Høegh-Dam-ip folketingip oqaluttarfianit oqaaseqarnissani kalaallisut ingerlatissallugu toqqarpaa, taamaalillutik folketingimi ilaasortaqatai, Aaja Chemnitz eqqaassanngikkaanni saqqummiussineq paasisaqarfiginngitsoorpaat. Saqqummiussereernermi kingorna ilaasortaqatini qallunaat apeqquteqaraluartut danskisut akinagit kalaallisut akiorpai, tikkuarpaalu kalaallisut oqalunneranik qatsussinerartut ataqqinninnginnermik takutitsinerarlugit.
- Uagut kalaalliusugut ukiorpassuarni maniguuppallaarujussuarpugut, isiginnarpagummi danskit uagutsinnut naalakkersuisut aammalu inatsisinik uagutsinnut atuutsinneqartussanik aalajangersaasartut namminneq oqaatsitik atorlugit, naak kalaalerpassuit paasisinnaanngikkaluaraatsik. Paasisinnaanngilara taamak qisuariartoqarmat, uffa oqaluttarfimmiit 10 minutsinnguit atorlugit kalaallisut oqaluttunga.
Taamaammat Aki-Matilda Høegh-Dam-ip toqqarpaa, oqaloqatigiinnissamik ujartuerpalaanngitsutut oqaatigineqarsinnaasumik piffissani folketingip oqaluttarfiani saqqummiussinermut atussallugu, taanna Sermitsiaq.AG-mut ilisimatitsivoq.
Nutserisoqanngitsoq
Aki-Matilda Høegh-Dam ilisimatitsivoq, sapaatip akunnerata siulianili Folketingip siulittaasoqarfia ilisimatereersimallugu kalaallisut oqaatsit atorlugit saqqummiussiniarluni. Taamaakkaluartorli saqqummiussinerata nalaani nutserisoqanngilaq. Sermitsiaq.AG-mit sulissutigaarput folketingip siulittaasoqarfianit oqaaseqartitsiniarluta.
Oqaaseqarnermini kingumut naqissuserpaa, nammineq isummani naapertorlugu Naalagaaffeqatigiinneq piunngitsoq, tassungalu itisiliissutigaa nunat pingasut akornanni naligiimmik ingerlatsisoqanngitsoq aammalu danskit folketingimi qinikkat danskillu naalakkersuisuisa oqariartaaseq naalagaaffeqatigiinneq aatsaat atortaraat namminneq soqutigisaminnik Danmarkimullu iluaqutaasussanik siuarsaaniaraangamik.
Dankit folketingimi qinigaatitaasa aammalu naalakkersuisuisa, danskit soqutigisaat siuarsarniaraangamikkit oqariartaaseq Naalagaaffeqatigiinneq aatsaat atortarpaat, piviusumilli naalagaaffeqatigiittoqanngilaq, tamannalu arlalippassuariarlunga saqqummiuttaraluarpara paasitikkusullugit oqariartaaseq naalagaaffeqatigiinneq eqqunngitsuusoq, aammalu arlaannatsinnulluunniit iluaqutissarsiffiunngitsumik danskit tungaannit nammineq soqutigisanik siuarsaaniarnermut taamaallaat atorneqartarami, tamannalu isumaga naapertorlugu kukkuneruvoq, Aki-Matilda Høegh-Dam erseqqissaavoq.
Paasineqarnissaq neriuutigigaa
Siumut sinnerlugu folketingimi ilaasortap oqaaseqarnissamut piffissani atorpaa nalunaarutigalugu Kalaallit Nunaat naalagaaffinnguliivissoq, aammalu inuiaqatigiit Kalaallit Nunaanniittut alloriarnissamut piareersimasut. Tamanna pillugu ukiuni arlalinni inuiaqatigiiinni misissuisoqartarpoq, misissuinerullu kingulliup takutinnikuuaa namminiilivinnissamut apeqqummi innuttaasut inuuniarnikkut atukkat ajorseriaateqartinneqannginnissaat pingaartinneqartoq.
Aperineqarami naalagaaffeqatigiinneq pillugu oqallinnermi kalaallisut oqaaseqarnissaminik toqqaanini sumut iluaqutissiissutaasinnaassangatinneraa, Høegh-Dam akivoq kalaallinut ulluinnarsiutaasoq taakku (folketingimi ilaasortat, aaqq.) paasisariaqaraat, tassa aalajangiinerit kalaallinut tunngasut kalaallit qulaatiinnarlugit ingerlanneqartartut aammalu oqaatsit kalaallit paasisinnaanngisaat atorlugit tamanna pisartoq.
Pisoq folketingip siulittaasoqarfiani oqaluuserineqassaaq
Naak massa Aki-Matilda Høegh-Dam ilisimatitsigaluartoq allattoqarfimminiit piffissaqarluartitsilluni ilisimatitsissutigineqarsimasoq kalaallisut oqaatsit atorlugit saqqummiussinissani, oqaaseqarnerata nalaani oqaaseqartartut arlallit assut tupassimasutut pissuseqarput. SF sinnerlugu Folketingimi ilaasortap Karsten Høngep oqaaseqartoq apeqqarissaarfiginiaraluarpaa, taamaattorli aamma Høegh-Dam apeqqutinut kalaallisut akiuivoq. Tamatuma malitsigisaanik oqaaseqartartut arlallit apererusukkaluarlutik tunuartiinnarput.
Maanna pisoq Folketingip siulittaasoqarfiani oqaluuserineqartussanngorpoq, aamma tassani nalilerneqartussanngorpoq folketingimi oqaatsit suut akuerisaallutik atorneqarsinnaassanersut.
Neriuppunga kalaallisut oqaatsivut folketingimi atorsinnaalissagigut, kisianni soorunalimi siulittaasoqarfiup qanoq aalajangernera ataqqiumaarpara.
Inatsisartuni kalaallisut qallunaatullu oqaluttoqarsinnaavoq, aammalu Inatsisartut allattoqarfianit isumagineqartarpoq nutserisoqarnissaa.
- Folketingimi kalaallisut oqaatsivut atorlugit saqqummiussisinnaanissarput ajornartorsiutitaqartussaanngitsutut isigaara, Aki-Matilda Høegh-Dam oqarpoq.
Siumut sinnerlugu folketingimi ilaasortap oqaaseqartartut allat danskisut apeqqarissaarfigivai, taamaattorli nammineq saqqummiussinermini apeqqarissaarfigineqarnerminilu kalaallisut oqaluppoq.
