Aki allattaanermut unnerluussisunut ilaavoq
Siumumi politikerini inuusuttuni ingerlalluartut ilaat, Aki-Matilda Høegh-Dam, Mikael Petersenip kinguaassiutitigut innimiilliorsimaneranut tunngatillugu unnerluussinissamut suliaqartuni pingaarnertut inissisimavoq. Marloqiusanilli anguniagaqarpoq, tusarfiit imminnut attuumassuteqanngitsut taama isumaqarput.
Siumut folketingimi ilaasortaatitaa Aki-Matilda Høegh-Dam arnat arlallit tapersersortigissallugit piffissami kinugllermi suliniuteqarsimavoq. Arnat taakku ataatsimoorlutik isumaqarsimapput Siumut allattaanera peertariaqartoq, isumaqaramik arnanut kinguaassiutitigut innimiilliortartoq.
- Akip kaammattorpaanga kinguaassiutitigut innimiilliornermut tunngatillugu unnerluussinermut allagaq atsiussaginga, itigartipparali. Mikael Petersenip nulukkut patinnikuuaanga, kisiannili unnerluussineq atorlugu pissaaneqarnermik tigusiniarsarisoqarpat, taava uanga peqataanissara kissaatiginngilara, arnaq kinaassutsiminik isertuussiumasoq oqaluttuarpoq.
Peqatigiit
Arnat allat Sermitsiaq.AG-p tusarfigii naapertorlugit, Mikael Petersenip peerneqarnissaanut Aki-Matilda Høegh-Dam allammik aamma peqquteqarpoq. Tassa partii Ilulissani juulimi ataatsimeersuarpat Vivian Motzfeldtip siulittaasunngornissaanut pitsaanerpaamik periarfissaqartitserusukkami.
Kim Kielsen partiip allattaaneranit tapersersortigilluartakkaminit tapersersorneqanngitsoq, tassaassaaq siulittaasoq siulittaasunngorniunnermi sanngiinnerusumik inissisimasoq, tusarfinnit nalilerneqarpoq.
Sakkortuumik nipeqarneq
Siumut partiiata allattoqarfiani kinguaassiutitigut innarliisarnermik iliuuseqartoqartarnera, arnat qulit Mikael Petersen pillugu unnerluussinerminni allakkaminni nassuiarpaat.
Politikerip utoqqaliarsaalersup tamanna ilisarilluarsinnaavaa, Sermitsiaq.AG-mullu ima oqaluttuarluni:
- Siumut partiiata allattoqarfianeeqqaartalerama angutit initunerujussuat pissusilersuutigineqartartullu assut tupaallaatiginikuuakka. Uannut killissamik qaangiineruvoq, naak angutaagaluarlunga misigisartakkakkalu assigiinngisitaaraluartut, politikeri oqaluttuarpoq.
Politikeri ingerlalluartoq, Folketingimut qinigaasoq, juunimi 2019-imi folketingimut qineqqusaarnermi partiimit tapersersorneqarluarsimannginnini aamma mamiangisimavaa. Tamanna pillugu parteeqatiminut ammasumik oqaluttuarsimasoq, Sermitsiaq.AG-p paasivaa.
Nipaanneq
Sermitsiaq.AG-p Aki-Matilda Høegh-Dam suliami attuumassuteqarnera pillugu oqaaseqartikkumallugu oqaloqatigisimavaa.
Oqarasuaatikkut sivikitsumik oqaloqatigiittoqareersorlu, attaveqatigiinnermut akisussaasup Lasse Strüwing Hansenip oqarasuaat tiguaa piumasaralugulu apeqqutit allaganngorlugit apuunneqassasut.
Oqaloqatigiinneq marlunngornermi pivoq. Oqaloqatigiittoqareermallu Sermitsiaq.AG-p apeqqutit allaganngorlugit nassiuppai, neriorsorneqarluni pingasunngornermi nunatsinni ullaakkut nalunaaqutaq 8.00 missaani akineqareersimassasut.
Unnerluutit isertuullugit apuunneqartut
Sermitsiaq.AG akissutinik pissarsinngilaq. Taamatullu Aki-Matilda Høegh-Dam attaveqatigiinnermillu akisussaasoq oqarasuaatikkut attavigineqarsinnaajunnaarsimapput.
Mikael Petersen pillugu naammagittaalliornerit unnerluussutinik imaqartut Sermitsiaq.AG-p pingasunngornermi pissarsiarai, sisamanngornermilu ullaakkut oqaluttuaq saqqummiunneqarluni.
Sermitsiaq.AG-p politikerip suliami peqataasimanera pillugu uku akissutiserusukkaluarpai:
- Suliniut Vivian Motzfeldt peqatigalugu piareersarpiuk?
- Qineqqusaarnermi ersarinnerusumik tapersersorneqarsimannginnerit mamiasuutigaajuk?
- Ataatsimeersuarnermi pisussami, siulittaasunngorniunnermi Vivian Motzfeldt tapersersorpiuk?