Skip to main content

Aki aamma Aaja: Kinguaassiutitigut kannguttaatsuliornermut tunngatillugu suliami suleriuseq ajortoqarpoq

Kalaallit Nunaata folketingimut ilaasortaatitai isumaqarput meeqqanut kinguaassiutitigut kannguttaatsuliorsimasut mianersoqqummik siunissami tunineqaannartannginnissaat anguniarlugu, Kalaallit Nunaanni pinerluttulerinermi inatsit imaluunniit eqqartuussisoqarnermi inatsit allanngortinneqartariaqartoq.

Folketingimut ilaasortat Aaja Chemnitz Larsen (IA) aamma Aki-Matilda Høegh-Dam (S) isumaqarput meeqqanut kinguaassiutitiugt kannguttaatsuliortoqarsimatillugu pineqaatissiisarneq misissuiffigineqartariaqartoq allanngortinneqarlunilu, pinerluuteqarsimasutut unnerluunneqartoq mianersoqqussummik taamaallaat tunineqartarnera, soorlu maanna Tasiilami taama pisoqartoq, pinngitsoortinniarlugu.

Angut 21-nik ukiulik niviarsiaqqamik aqqaneq-marlunnik ukiulimmik arlaleriarluni atoqateqarsimasutut Kommuneqarfik Sermersuup eqqartuussiviani unnerluunneqarami mianersoqqussummik tunineqarpoq.

LÆS OGSÅ: Anaanaasoq tupaqqasoq: Kinguaassiuutitigut atornerluisoq mianersoqqussummik tunineqartoq

Angut meeqqamik atoqateqarsimasutut unnerluunneqartoq eqqartuussivimmit mianersoqqussummik tunineqaannarsinnaappat, suleriutsimi ajortoqartoq, Aki-Matilda Høegh-Dam isumaqarpoq.

- Suleriutimi qanoruna kukkusimasugut? Tamassuma Folketingimi Inatsisartunilu oqaluuserineqarnissaa pisariaqartorujussuusoraara. Suleriutsit pitsaanerulersinniarlugit qanoq iliorsinnaanerput misissortariaqarparput, pinerlineqartut illersorneqarnerulernissaat anguniarlugu, maannakkutullu pinerliisimasut illersorneqartarnerat atorunnaarsinniarlugu. Meeqqamik atoqateqarneq qaqugukkulluunniit akuerineqarsinnaanngilaq, Aki-Matilda Høegh-Dam (S) Sermitsiaq.AG-mut oqarpoq.

Aaja Chemnitz Larsenip oqaatigaa Kalaallit Nunaanni suliani taama inissittoqarnera kisiartaanngitsoq. Kalaallit Nunaata Politiivisa Tasiilami meeqqanut inuusuttunullu kinguaassiutitigut atornerluisoqartarneranik misissuinerminni qulaajarpaat suliat 45 procentii uppernarsaatissaqannginneq allalluunniit pissutigalugit unitsiinnarneqartartut.

- Suliarpassuit unitsiinnarneqartarput matuneqarlutillu, illuatungeriit oqaasii kisiisa aallaavigalugit suliat ingerlasarmata. Soorlu pinerliisimasutut unnerluutigineqartup oqaasii taamaattoqarsimannginneraasut, pinerluffigitissimasullu oqaasii, taamaattoqarsimasoq. Suliani uppernarsaatissaaleqisarneq ajornartorsiuterujussuuvoq. Suliat siunissami unitsiinnarneqartassanngippata tamanna eqqumaffiginerusariaqarparput, Aaja Chemnitz Larsen oqarpoq.

Suleriutsit allanngortinneqartariaqarput

Kalaallit Nunaanni pinerluuteqarsimasup pitsaasumik katsorsarneqartarnissaa ilanngullugu anguniarneqartarpoq, pineqaatissinneqarsimanerup kingorna inuiaqatigiinni akuullualernissaa anguniarlugu. Danmarkimili pinerluut qanoq sakkortutiginersoq isiginiarneqartarluni, pillaatisiassap annertussusaa uuttuunneqartinnagu.

- Kalaallit Nunaanni angorusuttaratsigu pinerluuteqarsimasup katsorsartinnissaa, pineqaatissinneqareersimanerup kingorna inuiaqatigiinni peqataalluarsinnaanera anguniarlugu. Isumaqarpungali eqqarsaatigisariaqaleripput pinerluutip sakkortussusaa aallaavigalugu pineqaatissiisarneq atornerulissannginneripput, pinerluuteqarsimasoq pivallaarnagu, Aki-Matilda Høegh-Dam oqarpoq.

Kinguaassiutitigut atornerluisoqarsimatillugu pineqaatissiisarnerit sakkortunerulernissaannut tunngatillugu oqallinneq erngertumik aallartinneqartariaqartoq, folketingimi ilaasortat isumaqarput. Meeqqanik kinguaassiutitigut atornerluisoqarsimatillugu, pinerluttulerinermi inatsit imaluunniit eqqartuussisoqarnermi inatsit pisariaqassappat allanngortinneqartariaqarput.

Suliaqaritsi

Meeqqanik kinguaassiutitigut atornerluisoqarsimatillugu suliat unitsiinnarneqartannginnissaat anguniarlugu, Aaja Chemnitz Larsen aamma Aki-Matilda Høegh-Dam inatsisinik allanngortitsinissamik oqallinnissamik ujartuipput.

- IA-p inatsisit allanngortinnissaat siunertaralugu inuiaqatigiinni oqallittoqalernissaa ujartorpaa. Suliaqartut oqallinnermi peqataassapput. Naalakkersuisut oqallinnermik aallartitsisariaqarput, suliammi uppernarsaatissaqannginneq pissutigalugu unitsinneqaannartartut isiginnaaginnarsinnaanngilagut, Aaja Chemnitz Larsen oqarpoq.

- Tamatta oqallittariaqarpugut, Folketingimi aamma Inatsisartuni. Allannguuteqartoqassappallu, taava Naalakkersuisut inatsisinik nunatsinni atuutsitsilernissaq piaartumik suliarisariaqarpaat, Aki-Matilda Høegh-Dam oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER