Akerliussutsimik takutitsisut Naalakkersuisunut: Tunuarniaritsi
Nuummi pingasunngorpat akerliussutsimik takutitseqqinnissamut aggersaasoqarpoq. Illoqarfiit suli amerlanerusut kaammattorneqarput akerliunermut peqataaqqullugit
Inatsisartut ukiakkut ataatsimiinnertik naammassereeraluaraat, politikerit juullip eqqissinartuanik suli misigitinneqassanngikkunnarsipput. Tassa Naammaleqaaq! Nok er nok! pillugu aaqqissuussisut isumaat malissagaanni
Pingasunngormat akerliussutsimik takutitsisorpassuaqareersoq innuttaasut naammaginninngitsut pingasunngorpat akerliussutsimik takutitseqqinniarput. Tamanna akerliussutsimik takutitsiniat Facebookikkut saqqummiussimavaat. Oqaaserineqarniartullu maanna sakkortunerulersinneqarsimapput.
- “Naammaleqaaq!/Nok er nok” nilliaatigeqqittariaqarparput - Naalakkersuisut tusarnaarsimanngilaatigut! kaammattuut erseqqissumik piumasaqaatitalik imatut nipeqarpoq:
- Naalakkersuisut taarserneqartariaqarput, naalakkersuisut imminuinnaq sullinnerat unittariaqarpoq!
Akerliussutsimik takutitsiniat akitsuutit nutaat atuutsinneqalernissaat pillugu ullormi siunnersuuteqarfiusumi tuaviinnavissuaq aalajangiunneqarsimanera isornartorsiorpaat. Aamma isumaqarput, inuit isertitakitsut akunnattumillu isertitaqartut ajorluinnartumik eqqugaassasut.
- Naalakkersuisut “Naammaleqaat” paasisimanngilaat, patajaatsunik ataqqinnittunillu naalakkersuisoqarnissarput piumasaraarput! Ilissi pisariaqartitasi pinnagit innuttaasut pisariaqartitaat salliutissavasi. Oqariartuutit tusaasassavasi!
Pinagunngormat ilaatigut aamma Sisimiuni Narsamilu akerliussutsimik takutitsisoqarpoq. Aallarniisullu kaammattuipput illoqarfiit amerlanerit peqataaqqullugit.
- Neriuutigaarput akerliussutsimik takutitsinitsini aammaarluta ataatsimooqqissalluta aamma Kalaallit Nunaanni illoqarfiit amerlanerit massakkut peqataassasut!