Akerliussutsimik takutitsineq
Akerliussutsimik takutitsisoqareersoq: Aleqa naalaarneruniarpoq
Akerliussutsimik takutitsisut ikerinnakkut qinersinissaq piumasarigaluaraat Naalakkersuisut pissaaneq iperarumanngilaat
Naalakkersuisut akerliussutsimik takutitsiffigineqareersut Naalakkersuisut siulittaasuata Aleqa Hammondip Siumumeersup isornartorsiuinerit tusaatissatut tiguai. – Naalaarnerussaanga, Aleqa Hammond Inatsisartut ataatsimiittarfiata silataani akerliussutsimik takutitsisunut oqarpoq.
Inuit 150-init ikinnerulaartut Nuup qeqqani eqqaassutissanit Amisunit aallartittumik akerliussutsimik takutitsinermi peqataapput Inatsisartullu ataatsimiittarfiata silataanut apuullutik. Tassani akerliussutsimik takutitsinermik aallarniisoq Giiti Tittusen oqaaseqarpoq. Akerliussutsimik takutitsisut piumavaat innuttaasut peqaatinneqarnerusariaqartut.
- Periarfissinneqarusuppugut uranimut naaggaarluinnarsimanerup atorunnaarnissaata isummerfiginissaa. Aamma isummerfigerusupparput qanigisarsorneq akueriinnarusunnerlugu. Aamma isummerfigerusupparput innuttaasut peqataatinneqarnerunissaat peqataaffigerusunnerlugu, Giiti Tittusen oqarpoq.
Taassuma atsiornerit 1.600-ut sinnillit naalakkersuisut siulittaasuannut Aleqa Hammondimut tunniuppai tassanilu piumasarineqarpoq ikerinnakkut qinersinissaq.
- Naalaarnerussaanga. Naalakkersuisutut pisussaaffigaarput isumaqataasut akerliusullu naalaarnissaat, Aleqa Hammond oqarpoq.
- Nalunngilluinnarparput akisussaaffilittut naalakkersuisuunermi isornartorsiorneqarnissaq aamma ilaasoq. Kisianni aamma pisariaqarpoq pisarialimmik aalajangertarnissaq, Aleqa Hammond oqarpoq.
Akerliussutsimik takutitsinermit assit kingusinnerusukkut ikkunneqasapput