Akerliussutsimik takutitsinissaq taamaatinneqarpoq: Illuatungeriit isumaqatigiissuteqarput

Royal Greenland nipisat suaannut akimik nutaamik nalunaaruteqarpoq, pisortaq nassiussisoralugu. Maanna aallartissaagut, taama oqarpoq. KNAPK-p aki akueraa, ullumilu akerliussutsimik takutitsinissaq taamaatillugu.

Tunisinermut aki kiilumut 26 koruunit aamma 1 koruuni ajunngitsorsiassanngorlugu piareerluni, Royal Greenlandip marlunngornermi ullaap tungaani KNAPK-mut ilisimatitsissutigaa. Royal Greenland marlunngornermi ulloqeqqaanerani tusagassiuutinut taama nalunaaruteqarpoq.

Sermitsiaq.AG-p paasissutissaatai naapertorlugit KNAPK-p aki akueraa, ullumikkullu akerliussutsimik takutitsinissaq taamaatillugu.

- Uagut piginnittuttalu nipisanniarnissap piaartumik aallartinnissaa kissaatigaarput, taamaammallu aalisarneq aallartinniassammat aki qaffasinnerusoq maanna nalunaarutigaarput, Susanne Arfelt Rajamand, Royal Greenlandimi pisortaaneq oqarpoq.

Aki pillugu isumaqatigiissuteqareersut

Nipisannik tunisassianut ingerlatseqatigiiffiup nunani tamalaani niuernermut akinut tunngatillugu tunisagaannut aki nalunaarutigineqartoq aalajangersarneqartoq, Royal Greenlandip siusinnerusukkut ilisimatitsissutigaa, tamannalu suli pingaaruteqartoq, pisortaq Sermitsiaq.AG-mut oqarpoq.

- Aki nalunaarutigineqartoq siulleq malillugu piffissamut sivisuumut arlalinnik isumaqatigiissusioreerpugut. Taava maanna uagut niuerfimmi nioqqutissat sinnerinut akisunerusumik pisisinnaasunik nassaarnissaq suliassarilerparput, taanna oqarpoq, nangillunilu:

- Soorunami nalorninartortaqarpoq, kisianni aalisarneq aallartikkumallugu taamatut iliorpugut.

Royal Greenlandip taakku 900 tonsit nalunaarutigisatik suli pissarsiarisinnaassallugit pisortaanerup naatsorsuutigaa, suaallu tuninissaannut tunngatillugu isumalluarpoq.

Royal Greenlandimut annertuumik isertitaqaataanngitsoq

KNAPK-p aalisarnerup aallartinneqarnissaanut aki akuersaarneqarsinnaasoq taakkartugaat akueralugu, Royal Greenlandip ilisimatitsissutigaa.

Pisortaanerup oqarneratut, aalisarneq aalisartunut ingerlatseqatigiiffimmullu pingaaruteqarpoq, naak Royal Greenlandip aningaasaqarnerata ilaminiinnarigaluaraa.

- Nipisat suaannik tuniniaaneq isertitaqaatigingaarneq ajorparput, aalisartutsinnulli nunatsinnilu aalisarnermut pingaaruteqarluinnarpoq. Taamaammat Royal Greenlandip aalisartullu ataasiakkaat annaasaqaataasa minnerpaaffisaminiinnissaat anguniarlugu aaqqiagiinnginnerup unitsinneqarnissaa maanna anguniarneqarpoq, pisortaaneq oqarpoq.

Powered by Labrador CMS