Skip to main content

Akerliussutsimik takutitsineq: Inuit 1000-it missaat akerliussutsimik takutitseqqipput

Innuttaasut 1000-it missaat ullumi akerliussutsimik takutitsisoqarmat peqataaqqipput. Oqariartuutigineqarpoq innuttaasut politikerinit salliunneqartassasut.

Innuttaasut 1000-it missaat Nuummi illoqarfiup qeqqani Amisuni nalunaaqutaq 16:30 naapipput.

Arlallit oqariartuuteqartareerput Naalakkersuisut tunuassasut, akerliussutsimilli takutitsinernik aaqqissuisuusut eqqissisaapput, oqariartuutigalugulu akerliussutsimik takutitsinerni anguniarneqartoq tassaasoq suleqataanissaq peqataatinneqarnissarlu.

- Politikerit oqarput, uagunngooq avissaartuutsitsivugut. Kisianni avissaartuutsitsisut tassaapput, isornartorsiorneqartut. Uagut maaniippugut parteeqarata. Aamma taamaattuassaagut. Akerliussutsimik takutitsivugut isumarput takutikkusullugu, tusaaneqarusulluta peqataatinneqarusullutalu. Maani ataatsimoornitsinni, takutipparput ataatsimoorluta. Tamat oqartussaaneranni innuttaasut peqataatinneqartarput, aamma isumaqatiginngisat tusaaneqartarput, aaqqissuisoqataasoq Avaaraq Olsen oqarpoq tikilluaqqusinermini oqalugiarpoq.

Leiff Josefsen

- Kissaatigaarput politikkikkut sulinermi innuttaasut qitiutinneqarnissaat, Avaaraq Olsen oqarpoq.

Eqimattaq ”Naammaleqaaq! – Nok er nok!” sapaatip akunnerata siuliani pilersinneqarpoq. Tassa aningaasanut inatsisip aappaagumoortup ataqatigiilernissaa anguniarlugu pisiassat arlallit akitsuutaasa qaffanneqarnissaat Naalakkersuisunit siunnersuutigineqarmat akuerineqarlunilu. Sioraasat, imigassat aalakoornartutaqartut tupallu akitsuutaat qaffanneqarput, taakkulu saniatigut puussiat plastikkiusut aviisillu neqeroorutit akitsuuserneqarlutik. Akitsuusiinerup kingorna niuertarfiit ilisimatitsipput akitsuutit akilersinnaajumallugit annaasaqannginnissarlu anguniarlugu, nioqqutissat ilaat aamma akitsortariaqalerlugit.

Leiff Josefsen

Amisuni aamma Inatsisartut ataatsimiittarfiata silataani ajunaalernermi nalunaarutit raketit, akerliussutsimik takutitsisunit arlalinnit ikumatinneqarput.

Atsiornerit tunniunneqarput

Inuit 1300-it sinneqartut akerliunerminnik takutitsiniarlutik atsiorsimapput. Atsiornernik katersinermi oqariartuutigineqarpoq Naalakkersuisut aalajangiisarnerannut tunngaviit innuttaasunit naammagineqarunnaartut.

Leiff Josefsen

Akerliusut kissaatigaat meeqqat, meeqqanik sullissisut peqqinnissaqarfiillu Naalakkersuisunit salliutinneqassasut. Ilanngullugulu kissaatigineqarpoq innuttaasut peqataatinneqarnerunissaat.

Akerliussutsimik takutitsisut Amisuni aallartillutik Inatsisartut ataatsimiittarfiata tungaanut ingerlaaqatigiipput, ”Naammaleqaaq!” suaartaatigineqarluni.

Innuttaasut tunuppaat

Avaaraq Olsenip atsiornerit Naalakkersuisut siulittaasuannut, Kim Kielsenimut (S) tunniuppai, innuttaasut ataatsimoornerat peqataatinneqarnerunermillu kissaatigineqarnerat oqariartuutigalugu.

Kim Kielsen kingorna oqalugiarpoq, oqalugiarnerata nalaani akerliussutsimik takutitsisut tamarmik tunuppaat, takutinniarlugu “naalakkersuisut tusaajumannginnerat akuerinagu”.

Alle demonstranter vendte ryggen til formanden for naalakkersuisut, Kim Kielsen, under hans tale.
Leiff Josefsen

Kim Kielsenip erseqqissarpaa innuttaasut kikkulluunniit, tamat oqartussaanerat aallaavigalugu, akerliussutsimik takutitsisinnaasut isummaminnillu nittarsaasinnaasut.

- Inatsisartut aamma, tamat oqartussaanerata ataani sulipput, aamma Naalakkersuisut sulipput. Tamat oqartussaaneranni amerlanerussuteqartut aalajangigaat ataqqineqartussaavoq. Aamma naatsorsuutigaara amerlanerussuteqartut aalajangernerat ataqqineqarumaartoq. Nuannarigaanni nuannarinngikkaanniluunniit, Kim Kielsen oqarpoq.

- Akerliussutsimi takutitsinermit naatsorsuutigineqassanngilaq Naalakkersuisut tunuassasut, Kim Kielsen oqarpoq, akerliussutsimik takutitsisut “Naammaleqaaq!”- mik avaalaarterujussuarlugit.

Leiff Josefsen

Inuit Ataqatigiit siulittaasuat, Múte B. Egede, Partii Naleqqamit Jens Napaattooq aamma Suleqatigiissitsisunit Tillie Martinussen innuttaasut tusaaneqarnissaat oqalugiarnerminni pingaartippaat.

Inatsisartut ataatsimiittarfianni akunnerup affaa akerliussutsimik takutitsisoqareersorlu Avaaraq Olsen peqataasunut qujavoq.

Avaaraq Olsen ilisimatitsivoq akerliussutsimik takutitsineq taama ittoq naggataajugallartoq. Peqataasunulli ilisimatitsivoq, akerliusut suliniarnerat suli ingerlaqqissasoq. Københavnimi unnukkut nalunaaqutaq 20:30, tassa kalaallit peqatigalugit, aamma akerliussutsimik takutitsisoqarpoq.

Qatserisarfik qatserisartuni aalajaatsut pillugit nalliuttorsiorpoq
Ukiuni 40-ni kingullerni qatserisartut aalajangersut Nuumminngaanneersut illoqarfiit pingaarnersaanni ikuallattoqalersillugu orniguttarput qamiteriartorlutik, inuunermillu annaassiniariartorlutik....
Peqqinneq Susassaqartitsinerlu pillugit immikkoortortaq Kommuneqarfiup Allaffianut nuuppoq
Peqqinneq Susassaqartitsinerlu pillugit immikkoortortaq Imaneq-mi inissisimajunnaarpoq. Immikkoortortaq matuneqanngilaq, taamaallaalli Kuussuaq 2-mut Kommuneqarfiup Allaffianut nuutinneqarluni.
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

Seneste Ugeavis

SENESTE NUUK - NYHEDER