Royal Greenland nipisanniarfiusumi matumani nipisaat suaannik 815 tonsinik pisiaqarsimavoq, kilomullu 22 koruuninik akeqartitsineq attassimallugu, suliffeqarfimmit nittartakkatigut oqaluttuarineqarpoq.

Ukioq manna nipisanniarnissaq aallartinnerlussimavoq, tassani aalisartut piniartullu kattuffiat KNAPK aalisakkerivissuarlu Royal Greenland isumaqatigiissuteqarsinnaasimanngimmata.

KNAPK-mit Royal Greenlandip tunisinermi akigitinniagaa naammagineqarsimanngilaq, taamaammallu aalisarnermik aallartitserusussimanani.

Royal Greenlandimit KNAPK piviusorsiortuunnginnerarneqarsimavoq, illuatungaeerillu tunisaqarnissamut isumaqatigiissutaannik malinnissimanngitsutut oqaatigineqarluni.

Nipisanniarnissaq ullunik 18-inik kinguaattoorfioreerluni aallartinneqarsimavoq. Royal Greenlandimili tunisassialerinermi pisortap nipisanniarsimaneq naammagisimaarpaa:

- Nipisat suanniarneq iluatsittumik naammassivorngaasiit. 22 koruuninik koruunimillu ataatsimik aggornersiassaqartitsilluta akeqartitsinerput aalaakkaasimavoq tamannalu naatsorsuutaasimanngikkaluarpoq, Møller Lyberth Royal Greenlandimi tunisassialerinermi pisortaq oqarpoq.

Royal Greenlandimit nipisaat akisunerusumik akilerneqarusussimanngillat, tassani suliffeqarfiup tunisassiaminik naammassillugit suliarineqarsimasunik nunarsuarmi tunitsivinnut tunisaqarsinnaanera eqqarsaatigineqarsimalluni.

Ukioq manna nipisattassiissutit katillugit 1400 tonsiusimapput, Royal Greenlandimillu amerlanerpaat pisiarineqarsimallutik.