Akerliuneq Danmarkimut siaruaattoq
Danmarkimi kalaallit aamma isumaqarput, Kalaallit Nunaanni politikki ingerlanneqartoq 'naammalersoq'
‘Naammaleqaaq’ Københavnimi Christiansborg Slotspladsimi aqangu aamma nilliaatigineqarniarpoq. Naalakkersuisummi politikki ingerlataat pillugu akerliussutsimik takutitsinissamut aggersaasoqarsimavoq.
- Kalaallit Nunaanni aqutsineq ineriartornerlu pillugit naammaginninginnerput Danmarkimit takutinniarlugu Københavnimi Christiansborgip saavani akerliussutsimik takutitsiniarpugut, Facebookikut akerliussutsimik takutitsinissamut aggersaanermi taamatut allassimasoqarpoq.
Akerliussutsimimmi takutitsinissamik aaqqissuussisut isumaqarput, Kalaallit Nunaanni politikkimik qanoq ingerlatsisoqarnea aamma namminneq susassaralugu.
- Kalaallit Nunaanni ineriartorneq pitsaasumik ajortumillu, immannguaq annertuumillu tamatsinnut sunniuteqartarpoq, tassa ullut ilaanni angerlarluta Kalaallit Nunaannut uterniaraluaruttaluunniit imaluunniit assigiinngitsut pissutigalugit uternianngikkutta utersinnaanngikkuttaluunniit.
- “Naammaleqaaq!/Nok er nok” Kalaallit Nunaanni innuttaasut peqatigalugit nilliaatigisariaqarparput - Naalakkersuisut Kalaallit Nunaanni innuttaasunut tusarnaanngillat! Taamaammat Naalakkersuisunik tunuaqqusineq qinersisoqarnissaanillu piumasaqarneq tapersersorparput.