pilluarit

Aka Høegh sølviusumik Nersornaaserneqarpoq

Inatsisartut siulittaasuata tulliata aappaata Kim Kielsenip Qaqortumi Sulisartut Højskolianni nalliuttorsiorpaluttumik katerisimaarnermi Aka Høegh sølviusumik Nersornaaserpaa

Kim Kielsen, Aka Høegh aamma Aka Høeghip uia Ivars Silis

Inatsisartut Siulittaasoqarfiata Aka Høegh sølviusumik Nersornaaserpaa piffissami sivisuumi annertuumillu qalipaasutut, qiperuisartutut assiliartalersuisartutullu Nunatsinni nunallu tamalaat akornanni eqqumiitsuliortutut kalaallillu eqqumiitsuliaannik siammarterisutut assigiinngitsorpassuarnik suliaqarsimanermigut Kalaallit Nunaannik nersortarialimmik sullissisimanera pissutigalugu.

Inatsisartut siulittaasuata tulliata aappaata Aka Høeghimut oqaaseqarnermini ilaatigut makku erseqqissarpai:

- Nalitsinni eqqumiitsuliortutut eqqumiitsuliortutullu sulininni nunatsinni eqqumiitsuliorneq tamatumunngalu atugassarititaasut sunniuteqarfigalugillu isummersueqataaffigisimavatit eqqumiitsuliornerlu inuppassuit ulluinnarni inuunerannut atassusersimallugulusooq.

- Kunngip arnap uianik Prins Henrikmik kusanartumik suleqateqarsimanerpit taamatuttaaq tamatigoortumik eqqumiitsuliornermik siammerterinermut pikkorissuseqarnerit takutippaa, soorlu aamma Danmarkimi Folketingip Grønlandsværelsimik taasartagaanni eqqumiitsuliorlutit pilersitatit nuannaarutigineqaqalutillu nuannaalersitsisartut.

- 70-ikkut ingerlaneranni Nunatsinni assilialiorluni eqqumiitsuliornerup annertuumik nutarterneqarnerani siuttut ilagisimavaatsit. Kusassaanerit, titartagartalersuinerit, frimærkit, inunnik assiliilluni qalipaarnerit pinngortitamillu qalipakkat amerlaqisut suliarisimavatit. Eqqumiitsuliornikkut nutaaliorneq – kiisalu naalakkersuinikkut namminiileriartorneq ilutigalugu kulturip inissaqartinneqarnissaata nutaaliorfiunissaatalu pingaaruteqarneranik upperinninneq – ullutsinni kulturikkut inuunerup tamatigoortuuneranut tunuliaqutaapput.

- Taamaattumik aamma pissusissamisoortumik ingerlaqqinnerusimavoq Nunatta eqqumiitsulianik saqqummersitsisarfittaarnissaanik pilersitsiniarnermut ilungersortut ilagimmatsit, eqqumiitsuliornerup silarsuaani nunatsinnik puigugassaanngitsumik inissiisussamik, inuiaat avataaniillu tikeraartut ataatsimoorfigisinnaasaannik.

Powered by Labrador CMS