nersorneqarneq

Aka Høegh ridderkorsimik nersornaaserneqaqqippoq

Kalaaleq eqqumiitsuliortoq aappassaa kunngikkunnit ridderkorsimik nersornaaserneqarpoq

Aka Høegh - assi toqqorsivimmit

- Dronningimit ridderkorsimik tunineqaqqinnissara tusarakku nuannaajallallungalu tupaallappunga. Kukkusoqarnersoq apereqqaarpunga, siornatigummi taamaattumik nersornaaserneqareerpunga. Dannebrogordenimik Ridderkorset af 1. grad-imik tunineqartussaasungali nalunaarfigineqarpunga.

67-nik ukiulik Aka Høegh Sermitsiaq.AG-mut oqarpoq.

Dronning Margrethe sisamanngormat 75-nik ukioqalerpoq. Inuuissiorneranullu atatillugu inuit 74-it kunngikkormiunit nersorniarneqarput.

Eqqumiitsuliortut, katersugaasivinni pisortaasut, inuussutissarsiornermik suliaqartut atorfilittallu 74-it assinganik nersornaaserneqarput.

Nersornaaserneqartut ilagaat atuakkiortut Hanne-Vibeke Holst aamma Jussi Adler Olsen, aamma filmiliornermik ilitsersuisoq Thomas Vinterberg Dannebrogordenimit ridderkorsinnatsinneqarpoq.

Dronningi ataqqisaraa
Rdderkorset af 1. grad af Dannebrogordenen-imit Aka Høegh inuit 16-t allat peqatigalugit nersorniarneqarpoq. A.P. Møller-Mærsk-imi pisortaaneq Nils Smedegaard Andersen assinganik tunineqassaaq.

- Dronningi ataqqilluinnarpara, eqqumiitsuliornikkummi ilisimasaqartuuvoq, Aka Høegh oqarpoq. Ridderkorset af 1. grad af Dannebrogordenen-imik nassataqarluni Kalaallit Nunaannukaqqinnissani aamma qilanaaralugu oqaatigaa.

Københavniliaqqikkuni nersornaat tigujumaaraa Kulturimik ministeriaqarfimmit nalunaarfigineqarsimalluni aamma oqaatigaa.

Powered by Labrador CMS