Aka Hansen filmiliornermi nersornaasiuttakkamik nersornaaserneqartoq
Nuuk International Filmfestival arfininngormat septembarip 21-ani naammassineqarmat, filmiliortartut peqatigiiffiata Film.gl-ip filmiliornermi ukiumut nersornaasiuttagaa, Innersuaq, tunniunneqarpoq. Nersornaat filmiliortarfimmi pisortamut Aka Hansenimut tunniunneqarpoq
Naalakkersuisoq Ane Lone Bagger nersornaammik tunniussisuuvoq, oqalugiaamminilu ilaatigut pingaaruteqarnerarpaa, Aka Hansenip ilinniakkaminik naammassisimatsiarnermini Kalaallit Nunaannut utersimanera. Aka taamaalilluni nunatsinni filmiliortarnermut nukittorsaaqataavoq.
Aka Hansenip filmiliornermik ilinniakkani Super16 2018-imi naammassivaa. Akap ilinniarnermini naggataamik misilitsissutissatut filmiliornermi saniatigut KNR-ip isiginnaagassiaa "Inuk ilisaritillugu" aamma filmiliaraa. Aka tamatuma saniatigut Qaqortumi NIPITU-qartitsimmat, qanoq piviusulersaarutinik filmiliortoqartarneranik ilitsersuisimavoq.
Qujassuteqarluni oqaaseqarneq
Aka Hansenip nersornaaserneqarnermi kingorna oqalugiarnermini filmiornerup silarsuaani ukiut qulit kingulliit suleqatigisimasani qujassuteqarfigai.
- Tamassi immikkut ilikkagaqarfigaassi, tamatumunnga qujanaq.
Tamatuma saniatigut nersornaaserneqartoq kissaateqarpoq, matumanilu eqqumiitsuliortunut atugassarititaasut erseqqissaatigalugi.
- Nunatsinni eqqumiitsuliortut periarfigissagissaarnerusariaqarput. Assersuutigalugu uagut suliffitsinni qaammammut 21.000 koruuninnattarpugut, tamanna naammanngilaq, nersornaaserneqartoq oqarpoq.
Aka Hansenip suut immikkut pingaarnersuiorneqartariaqarnersut oqaatigaa.
- Kalaallisut, arnat meeqqallu allanit pingaarnerutinneqarlik.
Nersornaasiinissamut piumasaqaatit
Film.gl-ip Innersuarmik nersornaasiinermini nersornaat inummut kalaallit akornanni filmiliortarnermi, piviusuinnik tunngavilinnik isiginnaagassiortarneranni, nangeqattaartartuliortarneranni, titartakkanik isiginnaagassaliorneranni, filmiliornermik ilinniarneranni filmiliornermillu aqutsinermi immikkut ittumik malunnaatilimmut tunniunniarsimavaa.
Nersornaaserneqartussatut piukkunneqarsimasut pingasuupput. Tassalu Pipaluk K. Jørgensen, Inuk Jørgensen aamma Aka Hansen. Ved en afstemning blandt Film.glip ilaasortaasa akornanni taasisoqarmat, amerlanerpaat Aka Hansen 2018-imi kalaallit filmiliorsimasut akornaanni immikkut maluginiagassatut taasimavaat.