AK-p ilaasortaasa akissarsiaat qaffaavigineqalerput
19 millionit koruunit missaannik akissarsianik qaffaaneq AK-mi ilaasortanut tamanut taasissutissatut nassiunneqarpoq. Atorfillit Kattuffiat, AK, tusagassiutinut taama nalunaaruteqarpoq.
19 millionit koruunit sinnerlugit akissarsianik qaffaaneq AK-mi ilaasortanut tamanut taasissutissatut nassiunneqarsimalerpoq. AK tusagassiutinut nalunaarummini taama allappoq.
Akissarsianut isumaqatigiissutit qaffaavigineqartut ukuupput:
- Tjenestemændit
- Tjenestemanditut assingusumik atorfillit
- Funktionsoverenskomsteqartut
- Inunnik isumaginnittut
- Nakorsat allaattaat
- Kigutigissaasut
- Tandteknikerit
Atorfillit Kattuffiat aamma Namminersorlutik Oqartussat isumaqatigiissummik atsioqatigiipput, akissarsiat tamakkiisut ukiuni sisamani tulliuttuni katillugit 5,33 procentinik qaffaavigineqartussanngorlugit. Tassa akissarsiat tunngaviusut qaavatigut 18 milliuunit koruunit sinnerlugit qaffaasoqassaaq.
- Isumaqatigiissut pitsaasuuvoq, isumaqatigiinniarnermut kingullermut naleqqiullugu, taamanimi AK-p isumaqatigiissutaani amerlanerni, 3 procentit ukiunut sisamanut atuuttussaq angunikuuaa. Maanna angusap pitsaaqutigivaa akissarsiat qaffaassutaat tunngaviusumik akissarsiat tapillu katinnerinit % angusaasoq naatsorsorneqarmat, tunngaviusumik akissarsianit piinnarani, AK-mi siulittaasoq Dina Olsen tusagassiutinut nalunaarummi oqarpoq.
Tapit amerlanerit
Kigutigissaasut meeqqat immuttuutaannik suliaqartartut, inunnillu isumaginnittut meeqqanik sullissisartut akissarsiaqarnerulernissaminnut qilanaarsinnaapput. Isumaqatiginninniarnermimi taakku tapiisa annertusinissaat, AK-p sulissutigisimavaa.
- Nuannaarutigaarput sulisitsisut, sulisut toqqaannartumik meeqqanik sullissisisunut piumasaqaatigisatsinnut tusaaniarsimammata, AK-mi siulittaasoq oqarpoq.
Atorfillit Kattuffiat ullumikkut 1.150-nik ilaasortaqarpoq, siorna 990-siusimallutik.