AK-mi siulittaasoq: Tikisitsinermut taarsiullugu pikkorissaasoqarli

Sulisut nunaqavissut piginnaaneqartut tikisitsinermut taarsiullugu politikerit iliuuseqarfiginissaanut piffissanngorpoq. Atorfillit Kattuffianni siulittaasoq, Dina Olsen, taama isumaqarpoq.

- Paatsoorneqassanngilanga; Atorfillit Kattuffiata nuannaarutigeqai Nunatta avataaniit ilinniarluarsimasut tikillutik atorfiit ilinniarluarsimasunik pisariaqartitsiffiusuni suliassanik kivitseqataajumallutik minnerunngitsumillu nunap siuarsarnissaanut peqataanissaq pillugu suliartorlutik tikittarmata, Dina Olsen tusagassiuutinut nalunaarummi taama oqarpoq.

- Ajoraluartumilli takusarparput amerlavallaat ukiut arlaqanngitsut qaangiutiinnartut Kalaallit Nunaat qimattarmassuk. Taamaalisartut amerlassusaat erseqqissumik kisitsisaatiginngikkaluarlutigit kisianni ilisimasagut najoqqutaralugit oqaatigisinnaallutigu Nunatta avataaneersut piffissaq sivikitsoq sulereerlutik nunagisaminnut uteraangamik ilisimasat piginnaasallu annertuut, maani nunami pigilersimasat, nassarlugit nuuttartut, tamannalu Kalaallit Nunnaannut annaasaasaq annertooq.

Allaffissorneq akisunerulersittaraa

Sapaatip-akunnerata siuliani AG-p oqaluttuaraa, allaffissorneq alliartupiloortoq. Amerlasuut piffissami sivikitsuinnarmi suliartortarnerat, allaffissornerup ingerlanerlunneranut aamma aningaasartuutaangaatsiarneranut pisooqataasoq, Dina Olsen isumaqarpoq.

- Nunatta avataaniit sulisussanik aalleraangatta angalanerit pequtillu nassiuinneri Nunatta karsianit akilerneqartarput. Ukiut pingasut atorfeqareersimanermi soraarnermi taamatut aamma sulisoq akiliunneqarnissaminik periarfissaqartarpoq. Tamakku qanoq annertutigisumik ukiumut Nunatsinnut aningaasartuutaaneri takorloorneqarsinnaavoq.

- Taannaannaanngilarli, piginnaasarilikkat kiisalu utoqqalinissamut katersat, siunissami maani nunaqartut pisariaqartissamaaqisaat, anninneqartarput.

Pikkorissaanissamut pisussaaffilerneqassasut

Dina Olsenip piumanerugaluarpaa nunaqavissut piginnaanillit piukkunnaatillillu sulinerminni qaffakkiartortarnissaminnut periarfissinneqarnissaat.

- Tamanna pisinnaavoq soorlu Pisortat suliffeqarfiisa ukiut tamaasa sulisut amerlassusaat aliangersimasut qaffassarneqartarnissaat pisussaaffinngortinneqarneratigut. Taamaalillutik kontorfuldmægtiget AC-fuldmægtiginut naleqqersuussinnaanngorlugit qaffassarnerisigut, siunnersortit siunnersortaanernut naleqqersorsinnaanngortillugit qaffassarnerisigut aammalu immikkoortortarqarfinni aqutsisut pisortatut atuussinnaanngortillugit qaffassarnerisigut, AK-p siulittaasua taama isumaqarpoq.

- Taamaaliornikkut qulakkeerneqassaaq nunaqavissut akissaataasa pitsanngornerat, inissiat amerlanerusut atukkiunneqarsinnaalissapput aammalu utoqqalinissamut katersat annertusinerannik. Taamaattoqarnerani nunaqavissut inuuniarnerminni pitsaanerusumik atugaqalersinneqassapput, nammineq inigisamik pisisinnaanermik periarfissaqalissapput tamakkulu aamma kingunerisinnaavaat Nunatta avataanut nuuttartut ikilinerannik, Dina Olsen taama oqarpoq.