Ajutuuinnginnissamut sillimmateqarnermi meeqqat amerlanerusut sumiginnarneqarsimasut paasineqartut
Kommuneqarfik Sermersuup meeqqat ulloq unnuarlu angerlarsimaffiinut 25 milliuunit koruuninik immikkut aningaasaleeqqeqqammerpoq. Taama isiornermi nassuiaataavoq "inulerinermi ajutuuinnginnissamut sillimaniarneq pitsanngorsarneqarsimammat", ingerlatsivimmi pisortaq Martha Lund Olsen ilisimatitsivoq.
Illoqarfiit pingaarnersaata kommuniata meeqqat ulloq unnuarlu angerlarsimaffiinut aningaasartuutini amerleqqammerpai, ukiumilu 2019-imi aningaasartuutit taamaasillutik 225 milliuunit koruuniulerlutik.
- Meeqqat angerlarsimaffiup avataanut inissinneqartariaqartut amerlanerujartuinnartut nalaattarpagut. Kommuninut nalunaarutiginninnerit politiinullu nalunaarutiginninnerit ukioq manna aamma amerlanerusimapput. Pissutsit taakku marluk ataqatigiilluinnarput, Meeqqanut Ilaqutariinnullu ingerlatsivimmi pisortaq Martha Lund Olsen Sermitsiaq.AG-mut ilisimatitsivoq.
Aningaasartuutit annertusigaluttuinnartut
Komuni meeqqat ulloq unnuarlu angerlarsimaffiinut 142 milliuunit koruunit tungaannut 2017 tikillugu aningaasaliisarpoq. Aningaasaliissutilli maannakkumut – immikkut aningaasaliissutigineqartut 25 milliuunit koruunit ilanngullugit – 225 milliuunit koruuninut amerlineqarsimapput. Aningaasaliissutit 60 procentinik ukiut pingasut ingerlanerinnaanni amerlineqarsimapput.
Kommuni aningaasaliinermini naatsorsuinerluttarsimanera pillugu sulisut akornanni kinguneqartitsisoqassanngitsoq, kommunaldirektør Lars Møller-Sørensen Sermitsiaq.AG-mut erseqqissaavoq.
- Meeqqat ikiorneqartariaqartut soorunami ikiussavagut, aamma aningaasaliissutit sipporlugit suligaluaruttaluunniit, kommunaldirektøri erseqqissaavoq.
Sipaarniarnissaq anguneqarsimanngitsoq
Immikkoortortami 15 milliuunit koruuninik sipaartoqarnissaa ingerlatsiviup neriuutigisimagaluarpaa.
- Inuusuttut 18-inik ukioqalereersimasunut suli angerlarsimaffiup avataanut inissinneqarsimasunut inissianik sanaartornerup kingorna 15 milliuunit koruuninik sipaarsinnaanerput naatsorsuutigisimagaluarparput. Taamaattoq ulloq unnuarlu angerlarsimaffiit suleqatiginiarneri ajornakusoorsimavoq. Taamaammat neriuutigisaraluatsitut sipaaruteqarsinnaasimanngilagut, Martha Lund Olsen ilisimatitsivoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...