annaassiniaaneq
Ajunngitsoq nassaarineqartoq
Nuup eqqaani umiatsiaaqqami ujaasineq annertooq nuannersumik naammassineqarpoq. Isumannaallisaanermut atortunik nassartarnissaq politiit kajumissaarutigaat
Appanniaq tammaaneqartoq annertuumik annaassiniarnermik kinguneqartitsivoq.
Angut piniariarluni aallarnermi kingorna tikissimanngilaq, taamaattumillu politiit, sakkutuut kiisalu kajumissutsimik ikiuuttut ujarpaat.
Ujaasineq ippassaq ullumilu politiit angallataannik Sisammik, umiarsuaq alapernaarsuut Triton, qulimiguulik Lynx, SAR-ip qulimiguuliutaa S-61 kiisalu kajumissutsimik ikiuuttorpassuarnit pivoq.
Attaveqaateqanngitsoq
Angut tammaaneqartoq umiatsiaaqqamik angalasimavoq, VHF, GPS imaluunniit attaveqaatinik allanik nassataqarani angalasimavoq, tamatumalu ujaasineq ajornakusoornerulersippaa, sumiiffillu annertunerujussuaq ujaasiffiusariaqarluni.
Ullumi ulloqeqqaanerata missaani maqaasineqartoq ajunngitsoq, kisianni qiulersoq perlilertorlu nassaarineqarpoq.
GPS-imik, VHF radiomik imaluunniit isumannaallisaanermut atortunik allanik nassataqarani angalasoqartannginnissaanut kajumissaaripput, ajutoornermi piffissaatillugu nassaarineqanngitsoorsinnaaneq pissutigalugu.
Ukiukkut attaveqarnermut atortut aamma atisat oqortut nassartarnissaat pingaaruteqarpoq.