Ajunaarnersuaqaratarnissaanut sungiusarneq iluatsilluartoq
Uummannami ajunaarnersuaqaratarnissaanut sungiusarneq sapaatip akunnerata naanerani ingerlanneqartoq iluatsilluarpoq. Tassaarsuaqaratarsinnaaneranut sungiusarnerit siunissami ingerlanneqartassasut upalungaarsimasut iliuusissanik pitsanngorsaajuarniassammata, Avannaani upalungaarsimanermut pisortaq oqarpoq.
Uummannami arfininngornermi nalunaaqutaq 11.00 ajunaarnersuaqarneranut kalerrisaarut aallartinneqarpoq, innuttaasullu tamakkerlugit illoqarfiup qeqqani timersortarfimmukaqquneqarlutik.
Avannaata Kommuniani upalungaarsimasut ajunaarnersuaqaratarsinnaaneranut sungiusarput, tassaarsuaqaratarsinnaaneranullu atatillugu innuttaasut sungiusaqataatinneqarlutik. Kingullermik qaqqap sisoornerata kinguneranik tassaarsuaqarpoq junimi 2017-imi.
- Sungiusarneq ingerlalluartutut nalilerpara. Innuttaasut suliffeqarfiillu arlalissuit peqataapput. Sungiusarneq taama ittoq siulliuvoq, kingulliunngilarli, Avannaata Kommuniani upalungaarsimasut pisortaat, Iisaaq Pjettursson Sermitsiaq.AG-mut oqarpoq.
Taanna oqaluttuarpoq sungiusarnerit siunissami ingerlanneqartuassasut. Upalungaarsimanermullu tunngatillugu annikitsualunnik aaqqitassaqartassasoq, upalungaarsimasut piareersimanerpaaniassammata.
Siunissami sungiusarnerit arlallit
Karrat kangerluani qaqqap annertuup sisoorneranit tassaarsuaqassappat innuttaasut qutsissumukarnissaannut piffissaq sivikitsuinnaassaaq.
Sisoortoqarneranit malissuit siulliit inoqarfinnut qaaralernissaannut akunnerup affaata missaannaa piffissarineqassasoq naatsorsorneqarsimavoq. Qaarsuni mallit qaarartut 23 miiterit tikillugit qutsissusilimmut qaartarsinnaapput, Uummannamilu illoqarfiup sissamiit 14 miiterisut qutsitsigisoq malissuarnit anguneqarsinnaassalluni.
Tassaarsuaqarsinnaanera aarlerinartoq
Upalungaarsimasut pisortaat Sermitsiaq.AG-mut ilisimatitsivoq ajunaarnersuaqarsinnaaneranut sungiusarnerit nunaqarfinni aamma ingerlanneqareersimasut.
- Tassaarsuaqassappat upalungaarsimasuni qanoq iliuuseqarnissarput aalajangeeqataasuussooq. Taamaammat sungiusarnerit ingerlattassavagut upalungaarsimasut piareersimanerat pitsanngorsartuarumallugu, tassanilu innuttaasut peqataasassapput, Iisaaq Pjettursson oqarpoq.
Sungiusarnissap tullia suli ullulerneqanngilaq.