ajunaarneq

Ajunaarneq: Utoqqaat pingasut ajunaarput

Inuit arlallit ikiuupput sapaammi Uummannami annassiniartoqarnerani tassani inui pingasut ajunaarput pingasut annaanneqartut

Uummannami sapaammi ajunaartoqarnerani inuit ikiuuttut politiit qujassuteqarfigaat

Sapaammi ualikkut Uummannami umiatsiamik ajunaartoqarnerani toqusut tassaapput angut 71-nik ukiulik, arnaq 78-nik ukiulik arnarlu 67-nik ukiulik. Niviarsiaraq qulinik ukiulik uummarsaanikkut annaanneqarpoq.

Atuaruk: Uummannap eqqaani inuit pingasut ajunaarput - pingasut annaanneqarput

Inuit arfinillit umiatsiaaqqamik 14 fodsimik angissusilimmik Uummannamut ingerlatillutik sikumut aporput imaanullu ingeriussaallutik. Ajutoorneq nunamit 100 meterit missaannik ungasitsigisumi pisoq inunnit allanit takuneqarsimavoq taakkulu oqarasuaat angallattagaq atorlugu politiinut kalerrisaaripput.

Arlallit ikiuupput
- Politeeq angallammik pissarseriarluni ornigukkasuarsimavoq anngukkamillu takuaat inuit arfinillit tamarmik imaaniittut, Qaasuitsumi politiini pisortaagallartoq Kasper Berthelsen Sermitsiaq.AG-mut oqaluttuarpoq.

Umiatsiat arlallit aamma ajutoorfiusumut ornigukkasuarsimapput inuillu imaaniit qaqinneqarneranni ikiuullutik.

- Politiip niviarsiaraq qulinik ukiulik erngerlugu uummarsalersimavaa aammalumi uummatsillugu. Inuit allat pingasut toqungasut qaqinneqarsimapput taakkulu uummarsarneqaraluarnerat iluatsissimanngilaq, Kasper Berthelsen oqarpoq.

Ajunaartut tassaapput angut 71-nik ukiulik, arnaq 78-nik ukiulik arnarlu 67-nik ukiulik.

- Ajutoorfimmi inuit ikiuuttut arlaqartut assorujussuaq iluaqutaapput. Piaartumik takkussortoqarneratigut immaqa inuit suli amerlanerusut ajunaarnissaraluat pinngitsoortinneqarpoq, Kasper Berthelsen oqarpoq.

Ajutoorneq pillugu ilisimasaqarpit? Uunga allassinnaavutit: redaktion@sermitsiaq.ag

Powered by Labrador CMS