Ajunaalernermi sumiissusersiut akeqanngitsoq

Issittumi Sakkutooqarfik Kalaallit Nunaannik paarsisunik amerlanernik pissarsinissaminik kissaateqarpoq. Ajunaalernermilu sumiissusersiut akeqanngitsoq pilerisaarutaavoq.

Kalaallit Nunaannik paarsisut siorna aprilip qiteqqunnerani pilersinneqarput. Manna tikillugu 508-t ilanngupput. 200-nissaat anguniagaaqqaaraluarpoq.

Umiatsiamik angalasut amerlavallaat pisariaqartumik ajunaalernermi atortoqarnatik angallattarput. Taama Kalaallit Nunaanni politiit, sapaatip akunnerata siuliani Tasiilap Kulusuullu eqqaanni umiatsiaaqqat arlallit sikorsuarnik nikissinanajunnaarnerisa kingorna, Tunumi angallattut piffimmi sikorsuaqarneranik mianersoqqusisut isumaqarput, aviisi Sermitsiaq allappoq.

Tamanna ilaatigut angummut ukiukitsumik angalaqateqarluni umiatsiaaqqami ajunaalernermut kalerrisaaruteqanngitsumi ajutuulernermilu sumiissusersiffimmik pigisaqanngitsumi sikorsuarnik nikissinnaajunnaartut nalaappaat. Qujanaqisumik ullup tulliani ullaakkut sikorsuarnit anillassinnaa- simapput, ajoratillu angerlamut apuupput.

Taama pisoqarnerani ajunaalernermi atortunik pitsaasunik peqarnissap pingaarutaa Kalaallit Nunaanni politiit erseqqissaatigaat.

Puttaquteqarnissap, attallaanik annanniutinik, ajunaalernermi kalerrisaarutinik, atisanik oqortunik pisariaqartumillu annertunermik orsusaateqarnissap saniatigut VHF-mik radioqarnissaq ajunaalernermilu sumiissusersiffimik peqarnissaq aamma pingaaruteqarpoq.

– Atortunik pisariaqartunik peqanngikkaanni annaassiniarnermi aningaasartuutinik akiligassinneqarneqartoqarsinnaavoq, Kalaallit Nunaanni politiit mianersoqqusipput, peqatigisaanillu angallataatillit Kalaallit Nunaannik paarsisunut ilanngunnissaannik kaammattuillutik.

– Ajunaalernermi sumissiissusersiffimmik peqanngikkaanni taamaattumulluunniit akissaqarnani, Kalaallit Nunaannik paarsisunut ilanngunnermi taamaattumik akeqanngitsumik pissarsisoqarsinnaavoq, Issittumi Sakkutooqarfimmi oversergent christian Kronberg oqarpoq.

Allaaserineqartoq aviisimi Sermitsiami tamakkiisumik atuaruk. Aviisi uani pisiariuk:

Powered by Labrador CMS