Ajunaalernermi kalerrisaarisoqarmat ujaasisoqalersimasoq
Inuit pingasut umiatsiaararsortut ataasinngormat Sisimiut avannaata tungaani ujaarineqalersimapput. Paasinarsisimavorli kalerrisaarut kukkunikkut aallartinneqarsimasoq.
Politiit ataasinngormat nal. 11.01 Issittumi Sakkutooqarfimmit ulorianartorsiortoqarneranik kalerrinneqarsimapput.
Sakkutooqarfik ajunaalertoqarnerani kalerrisaarut Garmin-satellitsi Sisimiut avannaata-kitani immamiittoq aqqutigalugu tigusimavaat.
Kalaallit Nunaanni Politiit pigaartuisa pisortaat Malik Sandgreen oqaluttuarpoq.
Kalaallit Nunaanni Politiit ajunaalernermi kalerrisaarut aqqutigalugu paasisinnaasimavaat umiatsiaaraq Poca qaqortumik qalipaatilik pineqartoqa, umiatsiaaraq Sisimiuniit ataasinngormat ullaakkut qulingiluat eqqaani aallarsimavoq.
Timmisartoq qulimiguulillu ujaasiartortinneqarsimasut
- Inuit pingasut umiatsiaaqqamiittut kikkuuneri paasivagut, taakku Sisimiuniit Ilulissanukarlutik aallarsimapput, Malik Sandgreen oqaluttuarpoq.
Taassuma oqaluttuaraa, Issittumi Sakkutooqarfiup timmisartuutaa Challenger, minutsit 45-t atorlugit sumiiffimmukarsinnaasoq aallartinneqarsimasoq. Qulimiguulik aamma ujaasiartortillugu aallartinneqarsimavoq.
Tamatuma nalaanni Kalaallit Nunaanni Politiit inuit pingasut taakku Aasiaat Radioat aqqutigalugu attaviginiarsimavaat.
- VHF-radio aqqutigalugu attavigineqarsinnaasimanngillat. Ajunaalernermi kalerrisaarisoqarmat ernumasimavugut, Malik Sandgreen oqaluttuarpoq.
Garminimi atortorissaartut aallartinneqarsimasoq
Qulimiguulik sumiiffimmut apuummat inuit pingasut umiatsiaaqqamiittut attavigineqarsimapput, tassanilu paasinarsivoq ajunaalerlutik kalerrisaarisimanngitsut:
- Sunaaffa Garmin Inreach taskip iluaniittoq nammineerluni kalerrisaarummik aallartitsisimasoq. Ajunaalertoqarsimanngilaq - qujanartumik. Inuit pineqartut ajunngillat ikiorserneqartariaqaratillu, Malik Sandgreen oqarpoq.
Pigaartut pisortaata oqaluttuaraa, kalerrisaarut qanoq ililluni aallartissinnaasimanersoq pillugu inuit pingasut taakku politiinit oqaloqatigineqarniartut.