Ajortuaraq ukiut marluk atuutereersorlu: Inuit tamarmik tunillanneqassappat?
Piffissani soqutiginartuni ilaatigooriarlutik ernumaammernartartuni inuuvugut. Tunillatsissimasut piffissami kingullermi amerlagaluartut ilorraap tungaanut saakkiartulerfik tikikkiartulersimasinnaavarput. Nappaalanersuarmi »UKIUT pingajuat« aallartippoq.
Ataasinngorneruvoq nalinginnaalluinnartoq, alianangajattoq. Januaarip ulluisa 20-at 2020. Ukiukkut ataasinngornerit uernarnartigisinnaanerattut puioruminarsinnaanerattullu ittoq. Ullaakkut Ritzaus Bureauminngaanniit nutaarsiassaq takkuppoq, taanna KNR-ip nittartagaatigut nal. 11.08 saqqummiunneqarluni:
- Virusi allanartoq siaruaattoq, qulequttami allassimasoqarpoq.
Aviisi AG sapaatip-akunnerani matumani saqqummersoq, ukiut marluk ingerlaneranni coronap atuussimanera pillugu oqaluttuartoq taamatut allappoq.
Inuit pingasut toqusimapput, aamma Kinami, Japanimi Thailandimilu taassuminnga viruseqartoqalersimanera nalunaarsorneqarsimavoq. Uivernissamulli pissutissaqanngilaq.
- Virusip inuit akornanni tuniluuttarneranut takussutissanik suli maannamut nassaartoqanngilaq. Immikkut ilisimasallit ilaasa oqaatigaat, virusi nutaat Sarsitut ulorianartigigunanngitsoq, kisianni ilisimasaqarfigineqarnera killeqartoq, aamma tassunga akiuussutissamik peqartoqanngitsoq, Ritzau nalunaarpoq.
Suut takkukkiartuaalernerat taamani kimilluunniit ilisimaneqanngilaq. Ajortuaraq oqaatigiuminaatsoq aappaluttoq nassuusanik akinillu pisataqartoq.
Erininarsinngitsorli oqaaseq nutaarluinnaq ilikkarparput: Nappaalanersuaq. Nappaalaneq sakkortooq nunarsuarmi sumiiffiit minnerpaartaannulluunniit siaruaassinnaasoq illersuutillu annertuut nunanit qaammatini siullerni paatsiveerusimaarfiusuni pilersinniarneqartut tamaasa akimorlugit isersinnaasoq.
Kalaallit Nunaannili 2020-mi januaarip naalernerani suli eqqissisimasoqarpoq, aamma naak WHO nalunaaraluartoq, Covid-19-imik nappaalasoqalernera nunat tamalaat akornanni peqqinnissakkut ajornartorsiornertut maanna taaneqartariaqalersoq. Virusi nunavissuarnut tamanut siaruaassimavoq.
- Kalaallit Nunaanni tuniluunnerup siaruaannissaanut aarlerinaat appasissorujussuartut isumaqarfigineqarpoq, Naalakkersuisut nalunaarutaanni eqqissisaasoqarpoq.
Napparsimasoq Zero
Ullumikkut – ukiut marluk ingerlareersimalerneranni – nalunngilarput, Kalaallit Nunaanni peqqinnissakkut oqartussat pissutsit ilungersunarluinnartut ajunnginnerpaamik isumagisimagaat. Angut pisut qeqqanniittoq, nunatta nakorsaanera Henrik L. Hansen, eqqissisimasumik aqutsilerpoq, tamannalu ima ingerlalluartigalugu allaat siunnersuutigineqarsimalluni »Kalaallit Nunaata Ridderiatut« saqqarmiulerneqartariaqartoq.
Oqaluttuaq tamaat AG-mi sapaatip-akunnerani matumani saqqummersumi atuaruk, ugguuna iserfigisinnaavat: