Skip to main content

Ajorsarnerup kingorna: Assoralisimaarpugut

Assammik arsarnermi arnat nunanut allanut unammisartut ippassaq unnukkut Puerto Ricomut ajorsarput, unamminermi immikkoortoq siulleq ajunngikkaluaqisoq muminnermi Kalaallit Nunaat ataatsimik siuaqqallutik. Iluatsitsinngippallaarpugut, sungiusaasoq isumaqarpoq.

Kalaallit assammik arsarnermi arnat nunanut allanut unammisartui semifinalimi unammineq aallartilluaraluarpaat, muminnermi 12-11-mik Kalaallit Nunaat siuaqqalluni. Kisianni unamminermi iluatsinngitsoortut amerlapput, sungiusaasoq Johannes Groth taama isumaqarpoq.

- Ilungersorpugut. Ippassaq tikillugu unammilluarpugut, teknikkikkut kukkunikilluta piumassuseqarluarlutalu. Ippassaq saassussinerit amerlavallaarput pissaassuserlu ataatsimoorussarigatsigut unamminermi saassutsinnermut akissaqanngilagut, sungiusaasoq Sermitsiaq.AG-mut taama oqaluttuarpoq.

- Unammineq uatsinnut ajornakusoorpallaalerpoq, ajoraluartumik unamminermi iluatsitsinngippallaarpugut. Puerto Rico saassussinermi arfineq-marluullutik arfinilinnut amerlanerussuteqarlutik unammilluarput naak tamanna piareersarsimaffigigaluarsimallutigut, Johannes Groth oqarpoq.

Anguniagaq anguneqartoq

Kisianni assammik arsarnermi arnat nunanut allanut unammisartut VM-imut anngunniunnermi anguniagartik anguaat, tassa bronzinnanniunneq. Nunanut allanut unammisartut ukiunut tallimanut periusissatut pilersaaruteqarput, taassuma iluani naggataarutaasumik unamminermi ukiut marluk qaangiuppata ajugaarusupput ukiullu sisamat qaangiuppata unammeqattaarnermi ajugaarusullutik.

- Anguniagarput eqqarsaatigalugu piviusunngoreerpoq periusissarpullu malillugu ingerlatitsiinnassaagut. Siunissami inuusunnerit piginnaasallit qanoq sulissutigissagivut unamminerit ukua ersersippaat, nunatsinnimi niviarsiaqqani assammik arsartartuuteqarluarpugut – piginnaasallit siunissami ataqatigiissarneqassapput misilittagartuunullu unammisinneqarlutik, sungiusaasoq taama oqarpoq.

- Ullumikkut bronzinnanniussaagut, Kalaallit Nunaannut bronzi angerlaassinnaasuugutsigut nuannissagaluaqaaq, Johannes Groth oqarpoq.

Unnugu nunatsinni nalunaaqutaq malillugu 19.00 Kalaallit Nunaat Den Dominikanske Republikkilu bronzinnanniussapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER