Aningaasaqarneq aatsaat ajornerulissanngippat innuttaasut amerlanersaat namminersulivikkusupput. Aviisip Sermitsiap inuit isumaannik paasiniaaneranni tamanna paasinarsivoq.

Apersukkat 44 procentiisa namminersulivinnerup kinguneranik ajornermik inissisimasoqalissanngippaat aatsaat namminersulivikkusupput. 11 procentiinnaallu piumasaqaatitaqanngitsumik namminersulivikkusullutik. 12 procentit Kalaallit Nunaat namminersulivissagaluarpat ajornerulaalertoqarnissaa ajorinngilaat. 

Partii Naleqqamut qinersisartut 14 procentiinnai aamma piumasaqaateqanngitsumik namminersulivinnissaq tapersersorpaat.

Sisamaraaterutaat sinnerlugit, tassa 27 procentit, immikkut maluginiagassaapput. Taakkumi namminersulivikkusunngillat aaqqiissummilli namminersornerulernerup annertusisarneqarnissaanut ujartueqqusillutik. Kisitsit annertusingaatsiarsimavoq, 2002-mimi 18 procentiinnaat taama isumaqarmata.

Atuaruk: Namminiilivinnissamut angertut amerlanerussuteqarluartut

Kisitsisit taakku amerleriartut assigalugit qanorluunniit kinguneqarnissaa aallaaviginagu namminersulivinnissamut tapersersuisut aamma amerlisimapput. 2002-mi qanorluunniit pisoqaraluarpat namminersulerusuttut 6 procentiinnaasimagaluarput, taamatullu ajornerulaalertoqarnissaanut akuersaartut 7 procentiinnaasimagaluarlutik. Tassa maanna taakku marluk procentinik tallimanik amerleriaateqarsimapput.

Misissuinermi inuit 18-t sinnerlugit ukiullit 717-t apersorneqarput. Misissuinerullu pissutsinut piviusumik takutitsisinnaassusaa 95 procentiusoq kukkusumik saqqummiisoqarsinnaaneranut ilimanaataa 2,7 procentiuvoq.
 
Misissuinermi peqataasut ukiui, suiaassusaat, suminngaanneerneri partiimullu sumut tapersersuisuuneri Sermitsiami atuarneqarsinnaapput. Aviisi uani pisiariuk:

Sermitsiaq Uge 13 2017

Klik her for at læse