Ajornerpaamik pisoqassappat: Tassaarsuaqassappat nunaqarfiit marluk eqqugaassapput
Karrat Kangerluanni qaqqaq sisooriaannaq anginerpaaq sisuussappat nunaqarfiit marluk katillugit 100-t sinnerlugit innuttallit tassaarsuarmit eqqugaassasut misissuinerit nutaat takutippaat.
Uummannap eqqaani Karrat Kangerluanni qaqqaq sisooriaannaap anginerpaartaa sisuussappat Niaqornat tamakkerlugu Qaarsullu annerpaartaa tassaarsuarmit aatsaat taamak angitigisussamit, paasisallu siuliinit marloriaataanik annertutigisumit eqqorneqassapput. Tassaarsuaq 74 meterit angullugit nunamut tukkaangami qaffannerpaaffigisinnaagaa misissuinerup takutippaa.
Ajornerpaaq pissappat innuttaasut 35-t Niaqornaniittut tassaarsuarmit eqqorneqassapput. Nunaqarfik Uummannap eqqaani avasinnerpaami inissisimavoq.
Qaarsut uloriarnartorsiorfimmi aamma inissisimavoq. Qaarsut 170-t missaaniittunik innuttaqarpoq, misissuinerillu takutippaat innuttaasut katillugit 113-t qaqqaq sisooriaannaq anginerpaaq sisuussappat tassaarsuarmit eqqorneqassasut.
Nunaqarfiit allat tallimat
Misissuinerillu nutaat aamma takutippaat Nuugaatsiaq Illorsuillu tassaarsuarmit eqqorneqarnerpaajumaartut. Nunaqarfiit taakkua, tassaarsuamik 2017-imi aqqusaarneqareersimasut annertunerujussuarmik tassaarsuarmit qarsunneqassapput.
Nunaqarfiillu allat pingasut annikinnerusumik eqqorneqassapput. Saattuni innuttaasut arfineq-pingasut, Ikerasanni arfineq-marluk Ukkusissanilu pingasut tassaarsuarmit eqqugaasinnaapput.
Uummannamili tassaarsuaq ajornerusumik eqquissaaq. Peqqinnissaqarfik, Pilersuisup quersua, fabrikkilu tassaarsuarmit eqqugaassasut misissuinerup takutippaa. Taassumalu saniatigut innuttaasut qulit immap eqqaani najugallit navianartorsiorfimmi inissisimallutik.
Avannaata Kommunia innuttaasut tassaarsuaqassappat qimagussorneqarnissaanut pilersaarusiussapput. Pilersaarusiarlu qaqugu naammassissanersoq suli ilisimaneqanngilaq. Naalakkersuisut paasissutissiissutigaat innuttaasut tassaarsuarmit eqqugaasinnaasut namminneq aalajangissagaat najukkaminni suli najugaqarusunnerlutik.
Najugaqartitsiniarneq
Namminersorlutik Oqartussat kommunilu nunaqarfinni najugalinnut nuukkusuttunut attartortakkanik najukkanik neqerooruteqassapput. Namminneq sumut nuukkusunnerlutik aalajangissavaat. Nuuffissarlu aatsaat nuuffigineqarsinnaavoq attartortagassanik ineqarpat. Kommunip Naalakkersuisunit tapersersorneqarluni inissaqartitsineq isumagisassarigaa, Avatangiisinut Naalakkersuisoqarfiup paasissutissiissutigaa.