Kommunit aningaasaqarniarnerat
Ajornartooqqanermi missingersuut: Atorfinitsineq sanaartornerlu unitsippai
– Missingersuutip oqimaaqatigiinnissaanik piumasaqaat naammassiniassavarput, borgmester Jørgen Wæver Johansen neriorsuivoq. Missingersuut kingusinnerpaamik novembarip ulluisa 30-anni tunniunneqassaaq
Kommune Kujallermi kommunalbestyrelsi pilersaarutit naapertorlugit ukioq manna kingullermeerluni pingasunngornermi novembarip 26-ani ataatsimiittussaavoq, ataatsimiinnissamilu tassani kommunip 2015-imi missingersuutissai atuuttussanngortinneqarlutik akuersissutigineqassapput. Missingersuussiaq akuersissutigineqartussaq tassaasussaavoq ajornartooqqanermi missingersuussiaq, taassumalu suliarineqarnerani siunniusimaneqartussaq tassaavoq pinngitsoorani oqimaaqqatigiissumik inernilimmik missingersuussiortoqarnissaa Kommune Kujalliup qulakkiissagaa, kommuni tusagassiorfinnut nalunaarutikkut allappoq.
– Ukioq manna siusinnerusukkut qulariunnaavikkaluarparput Kommune Kujalleq 2015-imi nalimmassaarutit aqqutigalugit immikkut 15 mio. kroninik pissarsiassaqarumaartoq, maannali 2015-imi immikkut 15 mio. kroninik immikkut pissarsitinneqarsinnaanissarput naatsorsuutigisinnaajunnaarparput, Kommune Kujaliup borgmesteria Jørgen Wæver Johansen oqarpoq nangillunilu:
– Taamaakkaluartoq inatsisit naapertorlugit novembari naatinnagu aappaagumut missingersuutit naammassineqarsimanissaat suli pisussaaffigaarput.
Inatsisikkut piumasaqaatigineqarpoq missingersuussiornermi qulakkeerneqassasoq kommuni aappaagu qanoq ilinikkulluunniit naammattunik aningaasaateqartuarumaartoq.
Atorfinitsitsineq unitsinneqarpoq
Nalimmassaarutit aqqutigalugit Kommune Kujalliup 2015-imi immikkut 15 mio. kroninik pissarsitinneqarnissaanik Naalakkersuisut ukioq manna siusinnerusukkut aalajangernerigaluat atortussaajunnaarpoq, taamaattumik aningaasat taakku Kommune Kujalliup amigaatigisussanngornikuuai.
Kommunip aningaasaateqartuarnissaata qulakkeersimaneqarnissaa eqquutsissinnaajumallugu atorfiit inuttaqanngikkallartut inuttassarsiuunneqartarnerat unitsinneqassasoq kommunimiit aalajangiunneqareerpoq. Atorfiillu inutassarsiuunneqartussaajunnaartut inuttalerneqanngisimaaginnalissappata tamanna ajornartorsiutaalersussaavoq, tusagassiorfinnut nalunaarummi allassimavoq.
Atorfiit inuttaqanngikkallartut inuttassarsiuunneqartussaajunnaarnerisa saniatigut sanaartugassanut aningaasaliissutissarigaluit amerlanerpaartaat peerneqarput, aamma ilaatigut inuussutissarsiutinik piorsaaniarnermut aningaasaliissutissaraluit kommunip 2015-imut missingersuutissaanit peerneqarput.
Kommuni siusinnerusukkulli missingersuutissanik suliaqarnermini annertuumik sipaarniuteqareerpoq, taamaattumik missingersuutissaq tassaasussaavoq missingersuutit isumaqatigiinniutigineqarnissaat sioqqulluguli sipaarniuteqarfioreersoq. Kommunalbestyrelsimi ilaasortat aappaagumut missingersuutissaq pingasunngornermi novembarip ulluisa 26-anni inaarutaasumik aappassaanneerlugu oqaluuserissavaat, kommunip tusagassiorfinnut nalunaarutaani allassimavoq.