Ajaaja innuttaasutut tigusarisaqarnerminut nersorneqarpoq
Pinngitsaaliilluni atoqatiginnittoqarsimanerani pinerluttumik Ajaaja Lynge-Larsen ukioq kingulleq tigusarisaqarpoq, taanna pillugu politiinit nersornaaserneqarpoq.
Ajaaja Lynge-Larsen 6. decembarip unnuaagaa akisussaassuseqartumik, inooqataasutut pisussaanermik aammalu inoqatiminik pingaartitsisutut iliuuseqarluni sapiilluni aammalu piumassuseqqortulluni innuttaasutut tigusarinnippoq.
Taanna pillugu Kalaallit Nunaata Politiivi Ajaajamut Lynge-Larsenimut tulluartumik akissarsisitsillutillu nersornaasisitsipput.
Politiit Facebookimi quppernerminni allapput.
- Pinngitsaaliilluni atoqatiginnittoqarsimanerani pinerlussimasutut taaneqartoq Ajaajap arpalluni malippaa. Sivisujaamik arpareerluni angut tiguaa, pinerluttorli pinaasermat iperarpaa. Ajaajap malersoqqilerpaa, kingornalu anguaa inunnillu allanik takkuttoqarnissaata tungaanut aalajangeqqallugu tigummillugu. Kingunitsianngua politiit takkupput tigusarinnillutillu, nalunaarutigineqarpoq.
Politiit Ajaaja Lynge-Larsenimut akissarsititsinerat sisamanngormat pivoq.
- Kinguaassiuutitigut pinerluttarnerit inuiaqatigiit ajornartorsiusaasa annerpaartaasa ilagivaat. Ajaaja torrattumik iliuuseqarnermigut – pisumi taaneqartumi aammalu iliuutsimigut – ajornartorsiutip oqallisigineqarnissaanut paquminartuuneratalu kipitinnissaanut ikiuuppoq, politiit allapput.