Air Greenland: Timmisartoq Airbus iluarsartuussaq atorunnaarsinneqarallartoq
Timmisartup nutarsarneqaqqammertup teknikkikkut ajoquteqarnera pissutigalugu Air Greenland ataasinngormat Københavnimiit Kangerlussualiartussamik timmisartumik attartortariaqarsimavoq
Air Greenlandip pisortaanerata Jacob Nitters Sørensenip Sermitsiaq.AG-mut paasissutissiaraa, timmisartup iluarsartuunneqarnerani kingoraartissap taarsiunneqartup, ajutoornermut peqqutaaqataanera.
Kingoraartissaq immikkuullarissoq
- Kingoraartissap immikkuullarissuunera pissutigalugu timmisartup atuleqqinnissaanut ullualuit ingerlangallassapput. Timmisartulli pingasunngorpamiit atuleqqinnissaa naatsorsuutigilluinnarpara, pisortaaneq paasissutissiivoq.
Mattorsaanermi sakkoq immikkuullarissoq timmisartuutileqatigiiffiup sapaatiummat kingoraartissamik taarsiinermini pissarsiarisinnaasimanngilaa. Taamaammaat timmisartup atuleqqinnissaa ullualunnik kinguartinneqarpoq.
Kinguaattoorneq
Timmisartumik attartortariaqarnermi kinguneranik ataasinngornermi Kangerlussuarmiit Københavnimut timmisartuussinerit kinguaattoorfiungaatsiarput.
Timmisartoq sapaatit akunnerini arlalinni teknikkikkut annertuumik misissuiffigineqarpoq, timmisartullu ilua ilanngullugu nutarsarsarneqarluni.