Air Greenland: Suliumajunnaartoqarpat inuiaqatigiit sakkortoorujummik eqqugaassapput

Air Greenlandip Dansk Metalip isumaqatiginninniarnermi piumasaa akuerissappagu, Air Greenlandip unammillersinnaassusaa akornguserneqassaaq, ingerlatseqatigiiffimmit oqaatigineqarpoq.

- Dansk Metal-ip piumasaqaatai saqqummiunneqartut Air Greenlandip timmisartunut bilitsit akiisa unammillerluarsinnaanissaannik takorluugaqarneranut naapertuutinngillat, aammattaaq mittarfissat piareerpata.

Air Greenland tusagassiorfinnut nalunaaruteqarluni taamatut allappoq.

Dansk Metalip atlantikoq qulaallugu timmisartuussisarnermi apriilip qulingiluaaniit suliumajunnaartoqarniartoq nalunaarutigimmagu timmisartortitseqatigiiffik taamatut qisuariarpoq.

Air Greenlandi qisuariarluni Dansk Metalimi ilaasortat Air Greenlandimi sulisut tamaasa apriilip aqqarnani mattunniarpai.

- Danskit suliffeqarneranni pissutsit tunngavigineqartut

Suliumajunnaarnerup taamaalilluni nunami påskinngilaattaani timmisartukkut angallassinissat amerlanersaat unitsissavai.

Air Greenlandimit oqaatigineqarpoq, ingerlatseqatigiiffik sulisut akissarsiaannik appaaniarneranik Dansk Metalimit oqaatigineqartoq ilisarineqarsinnaanngitsoq:

- Dansk Metal-ip danskit suliffeqarneranni pissutsit aallaavigigai paasivarput. Naak
sulisut ilaat Kalaallit Nunaanni suligaluartut taamatut pisoqarpoq. Air Greenlandimiit nunatsinni ineriartornerup annertoqataanik akissarsianut tunngaviusunut qularnaveeqqusiinissaq neqeroorutigineqarsimagaluarpoq. Aamma taakku isumaqatigiissutinut, qanittukkut ilaatigut SIK-p ataani sulisugut pillugit isumaqatigiissutigeriikkatsinnut assingusuupput. Tamatuma saniatigut aamma Air Greenlandimiit sulinermut aaqqissuussinerit pilerinartut, illuatungeriinnut iluaqutaasussat neqeroorutigineqarput, Air Greenland tusagassiorfinnut nalunaaruteqarluni allappoq.

Sulisut kattuffiat suut tamarmik matuneqarsinnaanerannut pisuutikkaa

Dansk Metalimit pingasunngornermi Sermitsiaq.AG-mut nassuiaatigineqarpoq, sulisut marluk atlantikoq qulaallugu timmisartorsuarmik ingerlaartartumik Norsamik suliaqartartut suliumajunnaarsinneqarniartut. Sulisut kattuffianit oqaatigineqarluni tamatumunnga pissutaasoq, Islandi aqqutsaarlugu timmisartukkut allatigut Kalaallit Nunaannukartoqarsinnaasoq.

Air Greenlandimilli timmisartukkut angallassinerit tamarmik unitsinneqassappata Dansk Metal pisuussasoq:

- Dansk Metal Kalaallit Nunaata aamma Danmarkip akornanni silaannakkut
angallassinermik mattusiniarluni aalajangiigami, kingunerisassat aamma nunatsinni timmisartumik angallassinermut pingaarutilimmik sunniuteqassasut Dansk Metal-ip ilisimareerpaa. Ilaasartut affaat aammalu nassiussat allakkallu amerlanersaat, kiisalu inuussutissat nakorsaatillu Imarpik qulaallugu angallanneq aqqutigalugu tikittarput, taamaattumillu aningaasaqarneq inuiaqatigiillu eqqarsaatigalugit pingaaruteqarluinnartuulluni, Air Greenland allappoq.

Suliumajunnaarsitsiniarneq naapertuutinngitsoq

- Tamanna tunngavigalugu Air Greenland aalajangerpoq, Dansk Metal-imut ilaasortat, Air Greenlandimi sulisut tamaasa mattunniarlugit, sulisunut sulinngitsunut akissarsiassanik akiliisarnerup ingerlaannarnissaa aningaasaqarneq eqqarsaatigalugu akisussaassuseqannginnerummat, Air Greenlandimit tunngavilersuutigineqarpoq.

Timmisartortitseqatigiiffimmit suliumajunnaartoqannginnissaa neriuutigineqarpoq:

- Pingaartumik poorski sioqqullugu nalaanilu atuutsinneqaleriaannaammat, piffissamilu tassani nunatsinni pissartanngorniunnerit ilaqutariillu ataatsimoortarneri annertunerpaasarput. Piffissami tassani suliumajunnaartoqassappat, tamanna inuiaqatigiinnut tamarmiusunut eqquinerlungaatsiartussaavoq.

Sermitsiaq.AG-mit Air Greenlandi sulisoqarnermut pisortaq Mads B. Chrsitensen aperineqarsimavoq, sulisut akissarsiaasa ukiuni aggersuni appartinneqannginnissaa ingerlatseqatigiiffimmit qanoq qulakkeerniarneqarnersoq:

Kattuffinnik allanik isumaqatigiissuteqarsimasoq

- Ukiuni sisamani kingullerni Kalaallit Nunaanni ineriartortoqarsimanera misissorsimavarput. Tamanna tunngavigalugut isumaqatigiissuteqarniarsarivugut. Dansk Metalimit Danmarkimi ineriartortoqarnera susoqarneralu isiginiarneqarsimavoq. Sulisullu Kalaallit Nunaanni Danmarkimiunngitsoq sulisuupput.

- Akit qanoq ingerlajumaarnersut arlaannattaluunniit siumoortumik oqaatigereersinnaanngilaat, Mads B. Christensen oqarpoq.

Taassuma ilanngullugu oqaatigaa, Air Greenlandi SIK-mik HK-millu isumaqatigiissuteqareersimasoq, kattuffiit taakku Air Greenlandip timmisartoqarfissat nutaat atuutilerpata unammillersinnaassuseqarnissamik tunngavilersuutai akuersaarsimavaat, naatsorsuutigineqarpormi nunanit tamalaanit timmisartuutileqatigiiffinnit unammillerneqarnissaq.

- Kattuffiit taakku siunissamut qanoq ittumut ingerlanersugut takusinnaavaat. Dansk Metalimmullu neqeroorutigisimasatsinnit suliffeqarfinni allani ineriartortoqarnera allaaneruvallaanngillat. Kalaallit Nunaanni susoqarnera eqqarsaatigalugu suliassaqaqaaq, Mads B. Christensen oqarpoq.

Powered by Labrador CMS