Air Greenland: Sulisut naammagisimaarinninnginnerat ukkatarineqartoq
Johannes Groth siulersuisuni nutaatut ilaasortanngortoq, Jens-Jakob Lennert Sandgreen siulersuini ilaasortaajunnaarpoq.
Air Greenland Namminersorlutik Oqartussanit pigineqartoq 2021-mi 153 millioner koruuninik sinneqartooruteqarsimavoq, ingerlatseqatigiiffimmili sulisut aningaasatigut taamatut sinneqartooruteqaratik.
Sulisut naammagisimaarinninnerannik 2021-mi misissuisimanerup takutippaa sulisut naammagisimaarinninngilluinnartut, pisortaaneq Jacob Nitter Sørensen ingerlatseqatigiiffimmi ataatsimeersuartoqarmat oqaluttuarpoq.
Ukioq 2021 timmisartuutileqatigiiffimmut pitsaavallaarsimanngilaq, ukiup affaani siullermi corona aappassaanik tuniluutilermat sakkortuumik eqqugaasimagami, tassani ilaasussaagaluarpassuit ilaanngitsoorsimammata.
Ukiumili kingusinnerusukkut allatut ingerlaqqilersimavoq, ilaaniartummi imaaginnavissimammata.
Naleqqussaajuarsimaneq
Ingerlanerlulertarneq ingerlallualertarnerlu sulisunut sunniuteqarsimaqaaq, pisortaaneq oqaluttuarpoq:
- Naleqqussaajuarsimavugut - ilaanni ullormiit ullormut.
- Nalliuttorsiornissat, juullimi nereqaatigiinnissat, pisortat katersuutsinnissaat taamaatiinnartariaqarsimavagut - piginnaasanik ineriartortitsinerit annikillisissimavagut aamma katersuunnissamut killilersuutit pissutigalugit inatsisitigut pisussaaffeqarluni ilinniartitsinissat kisiisa ingerlassimavagut.
- Tamakkualu nassataannik sulisut 2021-mi naammaginnippallaarsimanatik, Jacob Nitter Sørensen ataatsimeersuartoqarnerani oqarpoq.
Kinguneqartinneqartoq
Suliffeqarfiup taamaammat 2022-mi Air Greenland suliffeqarfittut pitsaanerulersinniarsimavaa:
- Tamanna iliuuseqarfiginiarlugu sulisut naammagisimaarinninnerat ukkatarisimavarput - ilaatigut inuussutissarsiornermi psykologit allallu suleqatiginerisigut, takku pisortanik ilitsersuisimapput sulinermilu atugassarititaasut pitsaanerulersinniarlugit workshoppertitsimallutik.
- Sulisut nuannaartut sullitanik nuannaalersitsisarput, tamannalu takuneqarsinnaavoq, taamaammat suliarisimasavut imminnut attuumassuteqarput, Jacob Nitter Sørensen oqarpoq.
Siulersuisuni taarsiisoqartoq
Bodil Marie Damgaard siulersuisuni siulittaasutut ingerlaqqippoq, Naalakkersuisulli ilaasortat nalinginnaasut akornanni taarsiisimapput, tassani Jens-Jakob Lennert Sandreen ilaasortaajunnaarluni.
Nyt medlem blev Johannes Groth, KNI-mi niuertunik pilersuinermi pisortaasoq ilaasortanngortinneqarpoq, taanna arnat assammik arsartartut nunanut allanut unammisartuinut sungiusaasutut siusinnerusukkut ilisimaneqartuuvoq.