Air Greenland: Islandimi misiliigaluarneq pakatsinarpoq

Air Greenlandip ataatsimeersuarnerani pisortaaneq Jacob Nitter Sørensen ilisimatitsivoq timmisartuutileqatigiiffiup Islandimut timmisartuussinini 2018-imi amerlisimagai, Island niuerfiulluarsinnaanersoq paasiniarlugu.

- Annikitsuinnarmik iluanaaruteqarnerulerpugut. Niuerfimmit iluanaaruteqalaarpugut, Kalaallit Nunaannukartulli Islanditigoortittalernissaat iluatsissinnaasimanngilarput. Kalaallit Nunaannut angalasut Københavnimiit tikikkusunnerusarput, pisortaaneq saqqummiinermini oqarpoq.

Ilimasaarutit eqquutinngillat

Ukiuni arlanni ilimasaarutigineqartut, tassa Atlantikumi qeqertaaqqamut takornariartartut Kalaallit Nunaannut timmisartuuttarnissaat iluanaaruteqarfiulluarumaartoq, taamaasilluni eqquutinngilaq. Europap USA-llu akornanni Island angallattunit aqqusaarneqartarnera, angalasoqarnerpaaffiani sapaatip akunneranut pingasoriarluni Kalaallit Nunaannut aqquteqalersinneqarnerani, allanngortinneqarsinnaasimanngilaq.

Air Greenlandimi niuernermi pisortaq Maliina Abelsen ilisimatitsivoq Air Greenlandip Keflavikkimiit Ilulissanut 2019-imi sapaatit akunneranut sisamariarluni angalatitsinerniit pingasuinnanngortissallugit aalajangersimasoq.

Nuummiilli Keflavikkimut aqqutit eqqarsaatigalugit angalasoqarnerpaanerani sapaatit akunneranut pingasoriarluni angalatitsinerit attatiinnassallugit timmisartuutileqatigiiffik aalajangersimavoq. Angalasut amerlanerulaarnerani sapaatip akunneranut marloriarluni, angalasoqannginneruneranilu ataasiarluni tikittassalluni.

- Keflavikkimiit Ilulissanut aqqut kisimiilluta ingerlataraarput. Nuulli Keflavikkillu akornanni angalatitsinermi unammillerteqarpugut, Maliina Abelsen ilisimatitsivoq.

Niuerfik annikitsoq pilersaarutinili pingaaruteqartoq

- Islandi angalatitsinitsinnut allanut sanilliukkaanni niuerfiuvoq annikitsoq. Pilersaarusiornermulli tunngatillugu allatorluinnaq inissisimavoq. Islandimut misilittakkagut siorna ajoraluartut suli ukkatissavarput, aqquteqartitsinittalu pitsanngorsarnissaanut suliniutit ingerlatissallutigit, Maliina Abelsen ilisimatitsivoq.

Island ukiumut 2 milliuuninik takornariaqartarpoq, takornariallu amerliartupiloorlutik. Takornariaqarujussuarnerli islandimiunut akisuginarsinnaavoq. Takornariaqarpallaarnerup kingunerisaanik misigisassarsiorlutik takornariartut tikikkumajunnaartalerput. Misigisassarsiorlutik takornariartut immikkuullarissuupput, misigisassallu qanoq akeqarneri taakkununnga apeqqutaatinneqarneq ajorlutik. Immikkuullarissunik misigisaqarnissaq apeqqutaatinneqarnerusarpoq.

Tunniutiinnanngillat

Niuerfiusuni taama isikkoqartoqalernerata kingunerisaanik Islandimiit takornariat amerlanerusut Kalaallit Nunaannukartalernissaat, niuernermi pisortap ilimagaa.

- Island eqqarsaatigalugu aningaasanik amerlanerusunik isaatitsilernissarput suli siunniuteqqavarput, Maliina Abelsen erseqqissaavoq.