årsregnskab

Air Greenlandip ukiumut naatsorsuutaa pitsaasortaqarlunilu pakatsiffiusoq

Timmisartuutileqatigiiffimmi ingerlatsinermi angusarineqartut naammaginartutut nalilerneqartut

Air Greenlandip suliffissua 2013-imi akileraannginnermini 63,2 millioner koruuninik sinneqartooruteqarpoq. Akileraareernermi inernerusoq 41,2 millioner koruuniuvoq.

Siulersuisut ukioq manna naatsorsuutit inerneri naammaginartutut isumaqarfigaat.

- Ilaasutigut imaluunniit attartortitsisarnikkut niueruteqarneq naatsorsuutigineqartutut annertuserianngikkaluartut Air Greenland naammaginartunik angusaqarpoq. Ilaatigut aqutsisut sulisullu aningaasartuutinik ikilisaaniarlutik aallussiuarnerat pissutaalluni taamatut angusaqartoqarpoq. Ukiup ataatsip matuma siornatigut niuerfiup siuariarnissaa naatsorsuutigineqarsimagaluarpoq, kisiannili inuiaqatigiit kalaallit ataatsimut isigalugit aningaasakilliornerisa, taamaalillunilu uuliamik aatsitassanillu ujarlernerup annikillinerata kingunerisaanik tamanna pinngitsoorpoq, siulersuisuni siulittaasoq Jens Wittrup-Willumsen oqarpoq.

- 2013 ukiuuvoq ingerlatseqatigiiffiup oqaluttuarisaanerani IT-mut sulianik annerpaamik Air Greenlandip suliaqarfia. Tamatuma nassatarisaanik sullississutit 22-t, siaruarterinermi sullississummut Amadeus Altea-mut nuunneqarput. Atuisut taamaalillutik Air Greenlandimiit nunani tamalaani timmisartuutileqatigiiffinnut allanut bilitsinik ataqatigiitsitsillutik angalanernik pisisinnaalerput, Jens Wittrup-Willumsen oqarpoq.

Ingerlatseqatigiiffimmi sullississutinut ataasiakkaanut aningaasartuutit ikilisinneqarput, pingaartumik DHC8-p pitsaanerusumik atorneratigut aammalu ingerlatseqatigiiffiup timmisartuata Airbus 330-p allanngortiterneqarneratigut.

Naleqqussaanissaq
- Suliffissuup naatsorsuutitigut angusai akileraannginnermi 2012-imut naleqqiullutik 43,6 millioner koruuninik ajorseriarput. 2012-imi naatsorsuutitigut angusat sanaartukkanik pigisanik tunisinermi isertitanit 20,1 millioner koruuniusunit sunniuteqarfigineqarput, kiisalu 2013-imi angusat qulimiguulinnik EC225-nik marlunnik pisinerup taamaatinneqarneranit aammalu Amadeus Altea-p atulersinneqarneranut aningaasartuutinit sunniuteqarnerluffigineqarlutik, Jens Wittrup-Willumsen oqarpoq.

- Taamaattumik suliniutivut naleqqussartariaqarpagut, aammalu ilaatigut sullissisut allat qanittumik suleqatigalugit takornariaqarneq ineriartortinniarlugu nukiit suli amerlanerusut atortariaqarpavut, siulersuisunut siulittaasoq ilassusiivoq.

Powered by Labrador CMS