Air Greenlandip suliffeqarfiutai millioninik marlunnik kisitsisitalinnik sinneqartooruteqartut
Air Greenland timmisartuussinikkut ingerlatsinermi kisimi aningaasanik isertitaqanngilaq, kisianni aamma akunnittarfimmi aamma angalatitsivimmi.
Taakku ingerlatseqatigiiffiit piginneqataaffigineqartut marluk Hotel Arctic aamma Nunatta Angalatitsivia 2018-imi akileraareernermi 4,2 millionit koruuninik aamma 6,7 millionit koruuninik sinneqartooruteqarput, Air Greenlandip suliffeqarfissuartut ukiumoortumik nalunaarutaani tamanna atuarneqarsinnaavoq.
Nunatta Angalatitsiviani angusaq pillugu qullersat nalunaarumminni allapput:
- 2018-imi angusat iluarisimaarnartorujussuupput, ukiunilu kingullerni Nunatta Angalatitsiviata annertusaanissamut suliniutaannut ilassutitut pitsaasumik inissisimallutik qullersat allapput, taakku ukiup siulianut sanilliullugu suliat 8 procentinik amerleriarsimasut oqaatigaat.
Angalanerpaaffiusumi siuariarneq annikitsoq
Angalatitsivik 2018-imi piffissami angalanerpaaffiusumi appasinnerusumik siuariarpoq, kisianni tamanna piffissap angalaffiusup sinnerani pitsaasumik ingerlanermit illuatungilerneqarpoq.
Angalatitsiviup World of Greenlandimi piginneqataassutit 50 procentii pigai, taanna akileraareernermi 1,3 millionit koruuninik sinneqartoorpoq. Ingerlatseqatigiiffiup taassuma Glacier Lodge Eqi, Ilulissat avannaaniittoq pingaarnertut suliaqarfigai, tassanilu Lodgenik suliaqarneq aningaasaliiffigeqqinneqassasoq pilersaarutaavoq. Ingerlatseqatigiiffik aamma Ilimanaq Lodge, Ilulissat kujataaniittoq ingerlappaa.
Akunnittarfimmi unnuisut ikinnerit
Hotel Arctic 2018-imi naatsorsuutigisamit ikinnerulaanik unnuisoqarpoq aamma aningaasartuutit amerlanerujussuullutik. Tamanna tunngavigalugu akunnittarfiup naatsorsuutai naammagisimaarnartuusut qullersat isumaqarput.
Air Greenlandip suliffeqarfissuup aamma Norlandair 25 procentinik piginneqataaffigaa, Nordurflug 30 procentinik. Siulleq taakkartorneqartoq 1 millionit koruuninik angusaqarfiuvoq. Tamatuma akerlianik Nordurflugimi angusat minnerusumik naammagisimaarneqarput, qullersat ukiumoortumik nalunaarummi ilisimatitsipput.