Air Greenlandip pisiarineqarnissaanut Demokraatit akerliunertik attatiinnarpaat

Air Greenlandimi piginneqataassutsit Naalagaaffimmit pisiarineqarnissaat akerlerineqaraluartoq mittarfiliortiternissamut inatsisissaq akuerineqarsinnaavoq.

Demokraatit siulittaasuat Air Greenlandip pisiarineqarnissaanut tunngatillugu qularuteqarnani isummerpoq.

- Naalagaaffiup aamma SAS-ip Air Greenlandimi piginneqataassutaat Namminersorlutik Oqartussanit pisiarineqassanngitsut, Demokraatit aalajangiusimavaat, Niels Thomsen Sermitsiaq.AG-mut ilisimatitsivoq.

Niels Thomsenip eqqissisimalluni piumasaqaammik annertuumik aalajangiusimasaqarnera, mittarfiliortiternissamut inatsimmut aamma danskit aningaasaleeqataanerannut aarlerinartoqartitsinnginneranik pissuteqarpoq – taakku tamarmik Demokraatit tapersigaraat.

Naak pisiarineqarnissaanut isumaqatiginninniarusunneq Kim Kielsenip (S) aamma Lars Løkke Rasmussenip (V) Nuummi Ilulissanilu mittarfinnut danskit aningaasaleeqataanissaanut isumaqatigiissummi atsiugaanni allaqqagaluartoq, taakku marluk immikkoorput.

Naalagaaffiup akiliutigisaa aamma taarsigassarsiaa Air Greenlandimik piginneqataassutit pisiarineqarsinnaaneranut pituttorsimanngitsoq, Naalakkersuisut Siulittaasoqarfianni pisortap, Søren Hald Møllerip, siornatigut Sermitsiaq.AG-mut oqaatigereerpaa.

Naalakkersuisut siulittaasuata, Kim Kielsenip (S) tamanna paasissutissaq Inatsisartut aningaasaqarnermut ataatsimiititaliaanni isumasioqatigiinnermi uteqqinnikuuaa.

- Toqqammavimmigut isumaqatigiissut ataatsimoortuuvoq. Peqatigisaanilli Kalaallit Nunaanni inuussutissarsiornerup ineriartortinneqarneranut iluaqutaasumik suleqatigiinnerulernissaq pillugu isumaqatigiissummi immikkoortoq 4 aamma 5, mittarfiliassani naalagaaffiup peqataanissaa pillugu isumaqatigiissummi immikkoortuni 1- 3-mi ilaatinneqanngitsoq, Naalakkersuisut eqqumaffigaat, Kim Kielsenip aningaasaqarnermut ataatsimiititaliamut nassuiaaneranit imaqarniliami tamanna atuarneqarsinnaavoq.

Kim Kielsenip (S) aningaasaqarnermut ataatsimiititaliamut aamma ilisimatitsissutigaa, isumaqatigiissummi immikkoortut marluk isumaqatigiissummi ataatsimi takuneqarsinnaasut, taakku suleqatigiinnerup nukittorneqarnissaa pillugu Lars Løkke Rasmussenip oqaloqatiginninnermik tunuliaquteqarput, kisianni taakku immikkoortinneqarput.

Greenland Venturemut aamma Vækstfondenimi aningaasaliissutit, Air Greenlandimi piginneqataassutit Namminersorlutik Oqartussat Naalagaaffimmit pisiarinninnissaannut isumaqateqarnissaannut pituttugaanngitsut, Søren Hald Møllerip siornatigut Sermitsiaq.AG-mut ilisimatitsissutigereerpaa.

Taamaalilluni Naalagaaffiup Air Greenlandimi piginneqataassutaanik pisinissamut Demokraatit pituttoratik ullumikkut mittarfiliortiternissamut inatsit akueralugu taasisinnaapput.

Kim Kielsenip kingusinnerusukkut pisiarinninniassaguni, amerlanerussuteqarnissaminik ujartuisariaqassaaq.

Powered by Labrador CMS