Air Greenlandip billitsit utertittussanngorpai
Timmisartuussinerit tamarmik sapaatit akunnerni marlunni unitsinneqarallalerput, piffissamilu tassani angalasussaagaluit akiliutaat Air Greenlandip utertinniarpai.
Arfininngornerup unnuaanit – tassa tallimanngorneq 20. marts nalunaaqutaq 23:59 – aallarnerfigalugu Kalaallit Nunaanni illoqarfiit akornanni timmisartuussinerit tamarmik unitsinneqarallassapput.
Suliniut oqartussanit aalajangerneqarpoq, coronavirusip tuniluutilernissaa pinngitsoortinniarlugu. Naalakkersuisut siulittaasuat Kim Kielsen marlunngornermi ualikkut tusagassiortunik katersortitsinermini taama oqaluttuarpoq.
Piffissami tallani angalanissamik inniminniisimasut akiliutaannik Air Greenland utertitsisussanngorpoq:
- Atuisut tamarmik, Air Greenlandimit martsip 20-aniit ulloq apriilip 3-at ilanngullugu angalanissamik pisisimasut bilitsip akianik automatiskimik utertitsivigineqassapput. Bilitsisinermilu akiliutitut kortip sorliup atorneqarnera apeqqutaalluni, aningaasat utertinniarnerat sap.ak. 6-it tikillugit utaqqinarsinnaassapput, timmisartuutileqatigiiffik marlunngornermi unnukkut taama tusagassiorfinnut nalunaaruteqarpoq.
Utaqqisinnaassusermik piumasaqartoq
Atuisut angalatitseqatigiiffik aqqutigalugu billitsisisimasut angalatitseqatigiiffimmut, akiliutinik utertitsinissaq siunertaralugu saaffiginnissapput.
Timmisartuutileqatigiiffik atuisunut ataasinngormat saaffiginnippoq, atuisut saaffiginnippallaaqqunagit, suliffeqarfiup sullissiviata coronavirus pillugu saaffiginnissutit 200-t 300-llu akornanni ullormut tigusarmagit.
Timmisartuutileqatigiiffik utaqqisinnaassusermik qinnuiginnippoq:
- Atuisunut sullissivitsinnut maannakkorpiaq saaffiginnittartut
amerlaqimmata, naammagittartoqarnissaa kissaatigaarput, aatsaallu
apeqqutigiumasat nittartakkatsinni FAQ-imi akissutissarsinngikkaanni Air Greenlandip atuisunut sullissivianut uunga saaffiginnittoqartassaaq: websupport@airgreenland.gl, Air Greenland allappoq.
Angallassinerit unitsinneqaraluartut, taamaatoq timmisartuussinerit pisariaqavissut suli ingerlaassapput. Naalakkersuisut siulittaasuata Kim Kielsenip tamanna erseqqissarpaa.
Napparsimasut angallanneqartuaannarnissaat Namminersorlutik Oqartussat taamaasillutik qulakkeerpaat. Innuttaasut nalinginnaasumik illoqarfiit akornanni nunanullu allanut angalanerat unitsinneqarpoq. Nuummiit Keflavikkikkoorlugu Danmarkimut angallassinissaq aamma sulissutigineqarpoq, peqqinnissaqarfimmi sulisut, betjentit, coronavirusimullu tunillatsissimanermut misissugassat Statens Serum Institutimut utimullu angallanneqarsinnaanissaat, Namminersorlutik Oqartussanit qulakkeerneqarumammat.