Air Greenlandip akia maanna aalajangerneqarpoq
Air Greenlandip tamakkiisumik pigilernissaanut tunngatillugu Namminersorlutik Oqartussat pingaarutilimmik angusaqarput.
Danskit naalagaaffiata timmisartortitsiseqatigiiffimmi aktiat 25 procentii ullumikkut pigai, SAS-ip 37,5 procentit. Ingerlatseqatigiiffiup 62,5 procentii taakku maanna nalingat aalajangerneqarpoq, Sermitsiaq.AG taama tusagaqarpoq.
Ukiakkut 2018-imili suleqatigiissitat marluk timmisartortitseqatigiiffiup nalinga misissuiffigaat, taamaalilluni Namminersorlutik Oqartussat SAS-ip aamma naalagaaffiup piginneqataasutaat pisiarisinnaassammatigit. Ingerlatseqatigiiffiup nalinga SAS-imut aamma naalagaaffimmut kammeradvokatip nalilersuiffigaa, eqqartuussissuserisoqarfiullu Bech-Bruunip Namminersorlutik Oqartussat sinniisuuffigai.
Katillugu akia: 738 mio. kr.
Eqqartuussissuserisunit saqqummiussassaq saqqummiunneqaqqusaanngitsoq Naalakkersuisunut saqqummiunneqartoq, Kim Kielsenip aamma poorskip naanerani aningaasaqarnermut ataatsimiititaliamut akuerisassanngortippaa.
Tamakkiisumik piginnittunngornissamut akiliineq iluanaarutinik 461 millionit koruuninik Naalagaaffimmut aamma SAS-imut pissasoq, Sermitsiaq.AG-p tusarpaa.
Air Greenland 737,6 millionit koruuninik akilerneqarsimaneranik tamanna isumaqarpoq, taakkulu aningaasanit nammineq pigisanit 700 millionit koruuniusunit 2017-imut naatsorsuutini naatsorsorneqarsimasunit amerlanerulaarpoq.
Aningaasat taarsigassarsiarineqassasut
Taakku 461 millionit koruunit timmisartortitseqatigiiffiup aningaaseriviani pigineqanngillat, taamaattumillu ingerlatseqatigiiffiup taakku aningaasarpassuit taarsigassarsiariaqassavai, suliami Aningaasaqarnermut Ataatsimiititaliap aqagu aalajangiiffigisassaani atuarneqarsinnaavoq.
Sermitsiaq.AG-p tusagai naapertorlugit, mittarfissuit nutaat ukiut sisamat qaangiuppata piareerpata, taarsigassarsiat akilereersimanissaat pilersaarutaavoq.
Lars Løkke Rasmussenip mittarfiliortiternissamut aningaasarpassuarnik nassarluni septembarimi 2018-imi tikeraarneranut atatillugu, Air Greenlandip tiguneqarnissaat oqaluuserineqalerpoq.
Aningaasaqarnermut Ataatsimititaliaq
Aningaasaqarnermut Ataatsimiititaliap Naalakkersuisut qinnuteqaataat tallimanngornermi akuerinavianngilaat, apeqquterpassuarnik akineqartariaqartunik pilersitsinissaat naatsorsuutigineqartariaqarmat.
Air Greenlandip aktiaataanik tunisinermut paasissutissat saqqummiunneqartussaanngitsut pillugit illuatungiliuttunit aamma partiit ataasiakkaat pilersaarummut qanoq isumaqarnersut pillugit oqaaseqartitsinissaq Sermitsiaq.AG-mit iluatsissimanngilaq.