Air Greenlandip Airbus nutaaq 1,7 milliardilik pisiarerusukkaa
Tusarfik naapertorlugu Air Greenlandip Airbus nutaaq 330-800 timmisartortitseqatigiiffiup timmisartuutaata ukiunik 21-nik pisoqaassusillip Norsap taartissaatut pisiarinissaa isumaliutigaa.
Air Greenlandip Airbusitoqaa aappaluttoq A330-200, Kangerlussuup Københavnillu akornanni aalajangersimasumik angallassisartoq ukiut arlaqanngitsut qaangiuppata taarserneqartussaavoq.
Timmisartortitseqatigiiffiup Europami timmisartuliorfissuarmut Airbusimut, Frankrigimi Toulousemiittumut nutaamik A330-800-mik inniminniissanerluni taamalu pisinissaminut isumaqatigiissummik atsioqateqassanerluni piffissami matumani isumaliutigaa.
Tusarfik kinaassutsiminik isertuusserusuttoq Sermitsiamut taama oqarpoq.
2200 meterimut missinnaasoq
Timmisartup sarpeqanngitsup nutaap A330-800-p Air Greenlandip ukiuni 21-ni timmisartuutaanni annerpaaq A330-200 Norsamik taaneqartarnermigut ilisimaneqarnerusoq taarsissavaa.
- Air Greenlandimit Airbus nutaaq A330-800 isiginiarneqarluarpoq, tassa timmisartoq taanna Boeing 787-Dreamlinerimit piginnaaneqarnerummat. Tamatumani tunngavilersuutigineqarluni Airbus nutaaq mittarfinnut naannerumaanut Nuummi aamma Ilulissani 2.200 meteriusussanut missinnaanissaminut piukkunnaateqarnerummat. A330-800 timmisartoq pitsassuuvoq, tusarfik oqarpoq.
Nunatsinni mittarfissuit nutaat marluk Nuummi Ilulissanilu atulerpata, timmisartoq Norsamut taartaasussaq Københavnimit timmisartuussinernut atorneqassaaq.
Kalaallit Airportsimit oqaatigineqartut naapertorlugit mittarfissuassat taakku marluk 2023-p naalernerani piareerneqassapput. Air Greenland angalanissanut qanoq pilersaarusiussanersoq suli nalunarallarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: