annaassiniaaneq

Air Greenlandimi timmisartortartoq: Timmisartoq Cessna ima mitsipparput

Timmisartumik silaannarmi ajornartoortumik, Ståle Rogstad aappassaanik ikiuivoq

Paamiut mittarfiat

- Pissanganartorsiortoqanngivippoq, kisianni Cessnap motoorimik ataasiinnarmik ingerlalluni Paamiunut apuussinnaanera ernumassutigaarput.

Ståle Rogstad taama oqaluttuarpoq, taanna Air Greenlandip timmisartuani Dash 8-mi kaptajniuvoq, timmisartumilu aquttoq Heidi Skov Berli peqatigalugu, timmisartup Cessnap sisamanik issimasullip ajunaalernermut kalerissaarineranut atatillugu allaanerusumik suliaqarput.

Atuaruk: Timmisartoq motoorimigut ajoquteqarluni qularnaatsumik mittoq

Timmisartoq Cessna Canadamit Goose Bayimit Narsarsuarmut ingerlaarsimavoq. Aqqutaanilu timmisartortartoq motoorimik ajornartorsiorneq pissutigalugu, ajunaalerluni kalerrisaarummik nassiussisimavoq.

Silarluttoq
Dash 8 aamma Narsarsuarmut ilaasunik angallassilluni nalinginnaasumik ingerlaarpoq. Timmisartoq minutsit 15-it qaangiuppata tikittussanngortorlu, Nuummi Flight Information Centerip Air Greenlandimi inuttat nalunaarfigaat, timmisartoq Cessna ajunaalernermi kalerrisaarummik nassiussisimasoq.

Timmisartup Daship Narsarsuaq tikimmagu silagippallaanngilaq. Timmisartullu missinnaalernissaa neriuutigalugu sumiiffiup qulaani kaaviiaarpoq.

Appariartortoq
Tamatuma kingorna timmisartoq Cessna sumiiffimmut apuuppoq, timmisartullu taakku marluk radiukkut attaveqatigiilermata, Air Greenlandimi inuttat mittarfimmut attaveqatigiinnermut malinnasinnaanngorput, tassanilu Cessnap motooriata illua qamissimasoq paasinarsivoq. Taamaattumillu timmisartoq appariartorpoq, appasinnerpaaffissamilu 3 kilometerisullu qutsitsigisumiippoq, mittarfiup eqqaani qaqqanut apunnginnissaq anguniarlugu.

Cessnami timmisartortup akunnerni marlunni timminissamut ikummatissanik orsussaqartoq aamma nalunaarutigaa. Narsarsuarmut minnissaq iluatsissinnaanngippat, Kangerlussuaq mittarfinni qaninnerpaatut timmisartortup nalilikkani anguniarsariniarnerarpaa.

Paamiunut
- Narsarsuarmut tamatta maanna missinnaannginnerput paasinarsivoq. Piffik kaaviiaarfigaarput, appariarnissamullu periarfissaqanngilaq, silalu aamma ajorsigaluttuinnarpoq, Ståle Rogstad nassuiaavoq.

- Cessnami timmisartortartoq aperaarput mittarfimmut qaninnerpaamut Paamiunut ingiaqatigitikkusunnersoq. Taanna akuersivoq. Taamaaleriarluta timmisartup tunuanut inissippugut, radiukkullu sumiiffinnut ilitsersuussinnaavagut. Sinerissap tungaanut pisippagut, timmisartoq qaqqanik apugaqannginniassammat, naggataagullu mittarfiup tungaanut ilitsersuuppagut, Ståle Rogstad oqaluttuarpoq.

Air Greenlandip timmiarsartuanut ilaasunut inuttat ornitartik nutaaq nalunaarutigaat, taamatullu aamma aqqutaani suliassartik allaanerulaartoq nassuiaatigalugu.

Siullermiinngitsoq
Timmisartortartut taama suliassinneqartarnerat qaqutigoortigisumik, Ståle Rogstadip oqaatigaa. Kisianni timmisartumik ajornartoortumik aatsaat taanna ikiunngilaq.

Ukiut arlallit matuma siorna timmisartuara Sermersuarmut mittariaqarsimavoq, tassani Ståle Rogstad Kangerlussuarmi timmisartunik nakkutiginnittut aamma timmisartortartup akornanni attaveqaataasimavoq, timmisartortartup tassani nakkutiginnittoqarfik nammineerluni attaveqarfigisinnaasimanngilaa, taamatullu aamma qulimiguulik annaassiniarnermut peqataasoq ikiorsimavaa.

Ståle Rogstadip ilanngullugu oqaatigaa, ilaasut akornanni timmisartortartoqarnera timmisartumi inuttat iluaqutigisimavaat, taanna aqqutaani saniatigut attaveqaqatigiinnermut pisariaqartinneqartumut aquttarfimmi ikiuutaasimavoq.

Powered by Labrador CMS